പെരുന്നാള്‍ ദിനത്തില്‍ ആശംസകള്‍ നേര്‍ന്ന് നടി അനു സിത്താര പങ്കുവച്ച സോഷ്യല്‍ മീഡിയ പോസ്റ്റ് ശ്രദ്ധ നേടിയിരുന്നു. തലയില്‍ തട്ടമിട്ടിട്ടുള്ള നടിയുടെ പോസ്റ്റുകള്‍ നേരത്തെയും വൈറലായിരുന്നു. തന്റെ മതവിശ്വാസത്തെ കുറിച്ച് നടി അനു സിത്താര പറഞ്ഞ വാക്കുകളാണ് ഈ സാഹചര്യത്തില്‍ വീണ്ടും ശ്രദ്ധ നേടുന്നത്.

താന്‍ പാതി മുസ്ലീം ആണെന്ന് ആയിരുന്നു അനു സിത്താര പറഞ്ഞത്. ഉപ്പ അബ്ദുള്‍ സലാം, അമ്മ രേണുക. അച്ഛന്റെയും അമ്മയുടെയും പ്രണയ വിവാഹം ആയിരുന്നു. ഇരു വീട്ടുകാരും തമ്മില്‍ വലിയ തര്‍ക്കങ്ങള്‍ ഒക്കെ ഉണ്ടായിരുന്നുവെങ്കിലും താന്‍ ജനിച്ചതോടെ അതെല്ലാം മാറി. രണ്ട് വീട്ടുകാരും ഒരുമിച്ചു.

ഉപ്പയുടെ ഉമ്മ നിസ്‌കരിക്കാനൊക്കെ പഠിപ്പിച്ചിട്ടുണ്ട്. നോമ്പ് കാലത്ത് കൃത്യമായി വ്രതം എടുക്കാറുണ്ട്. തന്റെ എസ്എസ്എല്‍സി സര്‍ട്ടിഫിക്കറ്റില്‍ എല്ലാം മതം മുസ്ലീം എന്ന് തന്നെയാണ് കൊടുത്തിരിക്കുന്നത്. വീട്ടിലെ ആഘോഷങ്ങള്‍ക്ക് എല്ലാം ഒരു പ്രത്യേകതയുണ്ട്.

വിഷു, ഓണം ഒക്കെ വരുമ്പോള്‍ മലബാര്‍ സൈഡില്‍ എത്രയൊക്കെ സദ്യ വിളമ്പിയാലും എന്തെങ്കിലും ഒരു നോണ്‍ വെജ്ജും നിര്‍ബന്ധമാണ്. അത്തരം ആഘോഷങ്ങളില്‍ അടുക്കളയില്‍ നിന്ന് ഒരിടത്ത് നിന്ന് അമ്മൂമ്മ സദ്യ ഉണ്ടാക്കുമ്പോള്‍ അപ്പുറത്തെ സൈഡില്‍ നിന്ന് ഉമ്മൂമ്മ ബിരിയാണിയും ഉണ്ടാക്കുന്നുണ്ടാവും.

പെരുന്നാളിനും നോണ്‍വെജ് ഉമ്മൂമ്മ ഉണ്ടാക്കിയാല്‍ വെജ് ഐറ്റംസ് അമ്മമ്മയുടെ വകയായിരിക്കും എന്ന് അനു സിത്താര ഒരു അഭിമുഖത്തിനിടെ പറഞ്ഞിരുന്നു. അതേസമയം, ‘അനുരാധ ക്രൈം നമ്പര്‍ 59/2019’ എന്ന ചിത്രമാണ് അനു സിത്താരയുടെതായി ഇനി റിലീസ് ചെയ്യാനുള്ളത്.