ലോകമെമ്പാടും ആരാധകരുള്ള വെബ് സീരിസാണ് മണി ഹെയ്സ്റ്റ്. സീരിസിന്റെ അവസാന സീസണിന്റെ ചിത്രീകരണം പൂര്‍ത്തിയായ വിവരമാണ് നടന്‍ അല്‍വാരോ മോര്‍ത്തെ അറിയിച്ചിരിക്കുന്നത്. ചിത്രീകരണം പൂര്‍ത്തിയാക്കി സെറ്റില്‍ നിന്നും മടങ്ങുന്ന വീഡിയോക്കൊപ്പം വികാരനിര്‍ഭരമായ കുറിപ്പും അല്‍വാരോ പങ്കുവച്ചു.
“”മണി ഹെയ്സ്റ്റ് സെറ്റിനോട് അവസാനമായി വിട ചൊല്ലുമ്പോള്‍ വാക്കുകള്‍ അനാവശ്യമാണ്. എല്ലാത്തിനും ഒരുപാട് നന്ദിയുണ്ട്. ആരാധകരോട് (വിശേഷിച്ചും ഏറ്റവും ആദ്യം ഉണ്ടായിരുന്നവരോട്), വാന്‍കൂവര്‍ മീഡിയ പ്രൊഡക്ഷന്‍സിനോടും നെറ്റ്ഫ്‌ളിക്‌സിനോടും പിന്നെ എന്റെ ഏറ്റവും പ്രിയപ്പെട്ട പ്രൊഫസറോടും. നിങ്ങളോടൊപ്പമുള്ള ആ നല്ല നിമിഷങ്ങള്‍ ഞാന്‍ മിസ് ചെയ്യും, നന്ദി”” എന്നാണ് അല്‍വരോ മോര്‍ത്തെയുടെ കുറിപ്പ്.
ടെലിവിഷന്‍ സിരീസുകളില്‍ ലോകത്ത് ഏറ്റവുമധികം ആരാധകരെ നേടിയ സീരിസുകളില്‍ ഒന്നാണ് സ്പാനിഷ് ഹെയ്സ്റ്റ് ക്രൈം ഡ്രാമ മണി ഹെയ്സ്റ്റ്. 2017ല്‍ ആണ് മണി ഹെയ്സ്റ്റ് സംപ്രേഷണം ആരംഭിച്ചത്. ആന്റിന 3 എന്ന സ്പാനിഷ് ടെലിവിഷന്‍ നെറ്റ്‌വര്‍ക്കിലാണ് സ്പാനിഷ് ഭാഷയില്‍ ഒരുക്കിയ സീരീസ് “ലാ കാസ ഡി പാപ്പല്‍” എന്ന പേരില്‍ ആദ്യം റിലീസ് ചെയ്തത്.
Read more
പിന്നീട് നെറ്റ്ഫ്‌ളിക്‌സ് സിരീസിന്റെ ആഗോള അവകാശം വാങ്ങുകയായിരുന്നു. ഇംഗ്ലീഷില്‍ ഡബ്ബ് ചെയ്ത് എത്തിയതോടെയാണ് ലോകം മുഴുവനുള്ള പ്രേക്ഷകരും ഇത് ഏറ്റെടുത്തത്. 2020 ഏപ്രില്‍ 3നാണ് നാലാം സീസണ്‍ പുറത്തെത്തിയത്. അവസാന സീസണ്‍ ഈ വര്‍ഷം പ്രേക്ഷകരിലേക്ക് എത്തും.
