വര്‍ഷങ്ങളുടെ പ്രണയത്തിന് ശേഷം നടന്‍ വിഷ്ണു വിശാലും മുന്‍ ബാഡ്മിന്റണ്‍ താരം ജ്വാല ഗുട്ടയും വിവാഹിതരായി. പതിവായി കണ്ടു വരുന്ന താര വിവാഹങ്ങളില്‍ നിന്നും വ്യത്യസ്തമായി ആര്‍ഭാടങ്ങളോ താര സമ്പന്നതയോ ഇല്ലാതെയാണ് ഇരുവരും വിവാഹിതരായത്.
തങ്ങളുടേത് രജിസ്റ്റര്‍ വിവാഹമായിരുന്നു. എന്നാല്‍ ആചാരപ്രകാരമുള്ള ചടങ്ങുകളെല്ലാം രണ്ടു ദിവസം മുമ്പേ ആരംഭിച്ചിരുന്നു. ഹല്‍ദി, മെഹന്തി തുടങ്ങിയ ചടങ്ങുകളെല്ലാം ചെയ്തിട്ടുണ്ട്. ഏറ്റവും അടുത്ത ബന്ധുകളെയും സുഹൃത്തുക്കളെയും മാത്രമാണ് ക്ഷണിച്ചിരുന്നത് എന്നാണ് വിഷ്ണു വിശാല്‍ പറയുന്നത്.
നിലവിലെ കോവിഡ് സാഹചര്യം കണക്കിലെടുത്താണ് വിവാഹം ആഘോഷമാക്കാത്തതെന്നും വിഷ്ണു വ്യക്തമാക്കി. രണ്ട് വര്‍ഷങ്ങള്‍ മുമ്പായിരുന്നു തങ്ങള്‍ പ്രണയത്തിലാണെന്ന വിവരം വിഷ്ണു വിശാലും ജ്വാല ഗുട്ടയും പരസ്യപ്പെടുത്തിയത്. തങ്ങളുടെ ആദ്യ വിവാഹത്തില്‍ നിന്നും നിയമപരമായി വേര്‍പെട്ട ശേഷമാണ് ഇരുവരും വിവാഹത്തിന് തയാറായത്.
Read more
രാക്ഷസന്‍ എന്ന സൈക്കോ ത്രില്ലര്‍ ചിത്രത്തിലൂടെയാണ് വിഷ്ണു ശ്രദ്ധേയനായത്. രാക്ഷസന്‍ വിജയകരമായി പ്രദര്‍ശനം തുടരുന്നതിനിടെയാണ് താരം വിവാഹമോചിതനാകുന്നു എന്ന വാര്‍ത്ത വന്നത്. ഭാര്യ രജനി നടരാജനുമായി ഒരു വര്‍ഷത്തോളം പിരിഞ്ഞു താമസിക്കുകയായിരുന്നു. ബാഡ്മിന്റണ്‍ താരമായ ചേതന്‍ ആനന്ദ് ആയിരുന്നു ജ്വാലയുടെ ആദ്യ ഭര്‍ത്താവ്. 2011ല്‍ ഇവര്‍ വിവാഹമോചിതരായി.
