വിജയ് ചിത്രം ‘വാരിസില്‍ നടന്‍ ചിമ്പുവും എത്തുന്നുവെന്ന് റിപ്പോര്‍ട്ടുകള്‍ പുറത്തുവന്നിരുന്നു. നടനായാണോ ചിമ്പു എത്തുന്നതെന്ന് ആരാധകര്‍ സംശയിച്ചിരുന്നു.

ഇപ്പോഴിതാ വംശി പൈഡിപ്പള്ളി സംവിധാനം ചെയ്യുന്ന ചിത്രത്തില്‍ പിന്നണി ഗായകനായാണ് ചിമ്പു എത്തുന്നത് എന്നാണ് ഇന്ത്യഗ്ലിറ്റ്‌സ് റിപ്പോര്‍ട്ട് ചെയ്യുന്നത്. ഏറെ പ്രതീക്ഷയോടെ കാത്തിരിക്കുന്ന ചിത്രത്തിന്റെ സൗണ്ട് ട്രാക്ക് ഒരുക്കുന്നത് ചിമ്പുവിന്റെ അടുത്ത സുഹൃത്ത് കൂടിയായ തമന്‍ ആണ്.

സുഹൃത്ത് തമനും സഹോദരന്‍ ദളപതി വിജയ്ക്കും വേണ്ടിയാണ് ചിമ്പു വാരിസില്‍ പാടാന്‍ പോകുന്നതെന്നാണ് നടനുമായി അടുത്ത വൃത്തങ്ങള്‍ പറയുന്നത്. നിരവധി ചാര്‍ട്ട്ബസ്റ്റര്‍ ?ഗാനങ്ങള്‍ ആലപിച്ച മികച്ച പിന്നണി ഗായകന്‍ കൂടിയാണ് ചിമ്പു.

രണ്ട് അഭിനേതാക്കളുടെയും ആരാധകര്‍ ഏറെ പ്രതീക്ഷയിലാണ്. സിനിമയുടെ അവസാന ഷെഡ്യൂള്‍ ഹൈദരാബാദില്‍ പുരോഗിക്കുകയാണ്. ഡിസംബര്‍ ആദ്യ വാരത്തോടുകൂടി ചിത്രീകരണം പൂര്‍ത്തിയാകും എന്നാണ് പ്രതീക്ഷിക്കുന്നത്.

അതേസമയം, ചിത്രത്തിനെതിരെ മൃഗസംരക്ഷണ വകുപ്പിന്റെ നോട്ടീസ് വന്നത് ചര്‍ച്ചയായിരുന്നു. അനുമതി ഇല്ലാതെ മൃഗങ്ങളെ ഉപയോഗിച്ച് രംഗം ചിത്രീകരിച്ചതിനാലാണ് അനിമല്‍ വെല്‍ഫെയര്‍ ബോര്‍ഡ് ഓഫ് ഇന്ത്യ ചിത്രത്തിനെതിരെ കാരണം കാണിക്കല്‍ നോട്ടീസ് പുറപ്പെടുവിച്ചത്.