കാത്തിരിപ്പിന് വിരാമമിട്ടുകൊണ്ട് ഒടുവിൽ ആ പ്രഖ്യാപനം വന്നുകഴിഞ്ഞു. ലോകേഷ് കനകരാജും- രജനികാന്തും ആദ്യമായി ഒന്നിക്കുന്ന ഇതുവരെ പേരിടാത്ത ചിത്രത്തിന്റെ ഔദ്യോഗിക പ്രഖ്യാപനമാണ് ഇന്ന് വന്നത്. രജനികാന്തിന്റെ 171 മത് ചിത്രത്തിന് #തലൈവർ171 എന്നാണ് ടാഗ് ലൈൻ കൊടുത്തിരിക്കുന്നത്. നേരത്തെ തന്നെ രജനി- ലോകേഷ് കൂടുക്കെട്ടിൽ ഒരു സിനിമ വരുന്നുണ്ടെന്ന അഭ്യൂഹങ്ങളുണ്ടായിരുന്നു.
ചോരപ്പാടുകളുള്ള ഒരു പോസ്റ്റററാണ് ചിത്രത്തിന് നല്കിയിരിക്കുന്നത്. തന്റെ മുൻ ചിത്രങ്ങളായ കൈതി, വിക്രം പോലെ തന്നെ ആക്ഷൻ- ത്രില്ലർ ജോണറിലാവും തലൈവർ 171 എന്നാണ് പ്രേക്ഷകർ പ്രതീക്ഷിക്കുന്നത്. എന്നാൽ ചിത്രീകരണം ആരംഭിക്കുന്നതുമായി ബന്ധപ്പെട്ട വിവരങ്ങളൊന്നും ഇതുവരെ പുറത്ത് വന്നിട്ടില്ല.
സൺ പിക്ചേഴ്സിന്റെ ബാനറിൽ കലാനിധി മാരൻ നിർമ്മിക്കുന്ന ചിത്രത്തിൽ അനിരുദ്ധ് രവിചന്ദറാണ് സംഗീതം നിർവഹിക്കുന്നത്. അൻപറിവാണ് ചിത്രത്തിന് സംഘട്ടനമൊരുക്കുന്നത്. എന്തായാലും ജയിലറിന് ശേഷം രജനിയെ മാസ് ഹീറോയായി പ്രേക്ഷകർക്ക് വീണ്ടും കാണാം എന്ന പ്രതീക്ഷയിലാണ് ആരാധകരും സിനിമാലോകവും.
Read more
ജയ് ഭീം ചിത്രത്തിന്റെ സംവിധായകൻ ടി. ജെ ജ്ഞാനവേൽ രജനിയുമായി ചേർന്ന് ‘തലൈവർ 170’ എന്നൊരു സിനിമ പ്രഖ്യാപിച്ചിരുന്നു. വ്യാജഏറ്റുമുട്ടലുകൾക്കെതിരെ വിരമിച്ച ഒരു പൊലീസ് ഉദ്യോഗസ്ഥൻ നടത്തുന്ന പോരാട്ടമാണ് ചിത്രത്തിന്റെ പ്രമേയമെന്നും മലയാളത്തിൽ നിന്ന് ഫഹദും മഞ്ജു വാര്യരും പ്രധാന കഥാപാത്രങ്ങളായി ചിത്രത്തിലുണ്ടെന്നും സ്ഥിതീകരിക്കാത്ത റിപ്പോർട്ടുകളുണ്ട്.
