ദീപക് പറമ്പൊലും പ്രയാഗ മാര്‍ട്ടിനും കേന്ദ്ര കഥാപാത്രങ്ങളായെത്തിയ ഷൈജു അന്തിക്കാട് ചിത്രം “ഭൂമിയിലെ മനോഹര സ്വകാര്യം” മികച്ച പ്രതികരണങ്ങളുമായി പ്രദര്‍ശനം തുടരുകയാണ്. ചിത്രത്തിലെ “കണ്ണാരം പൊത്തി” എന്ന് തുടങ്ങുന്ന ഗാനമാണ് ഇപ്പോള്‍ പുറത്തെത്തിയിരിക്കുന്നത്. എ ശാന്തകുമാര്‍ എഴുതിയ വരികള്‍ക്ക് സച്ചിന്‍ ബാലു ഈണമിട്ട ഗാനം സോഷ്യല്‍ മീഡിയയില്‍ ശ്രദ്ധേയമാവുകയാണ്.
വിജയ് യേശുദാസും മൃദുല വാരിയറും ചേര്‍ന്നാണ് ഈ ഗാനം ആലപിച്ചിരിക്കുന്നത്. കാലിക പ്രസക്തിയുള്ള ഒരു പ്രണയകഥ ആധാരമാക്കിയാണ് ചിത്രം എത്തിയത്. ലാല്‍, ഷൈന്‍ ടോം ചാക്കോ, ഇന്ദ്രന്‍സ്, സുധീഷ്, അഭിഷേക് രവീന്ദ്രന്‍, അഞ്ജു അരവിന്ദ്, നിഷ സാരംഗ്, ഹരീഷ് പേരടി, സന്തോഷ് കീഴാറ്റൂര്‍, മഞ്ജു എന്നിങ്ങനെ നിരവധി അഭിനേതാക്കള്‍ ചിത്രത്തില്‍ അഭിനയിച്ചിട്ടുണ്ട്.
അഹമ്മദുകുട്ടി എന്ന കഥപാത്രമായി ദീപക് പറമ്പോലും അന്ന ജോസഫ് എന്ന കഥാപാത്രമായി പ്രയാഗ മാര്‍ട്ടിന്‍ ചിത്രത്തില്‍ വേഷമിടുന്നു. ബയോസ്‌കോപ് ടാകീസിന്റെ ബാനറില്‍ രാജീവ്കുമാര്‍ ആണ് ചിത്രം നിര്‍മ്മിച്ചിരിക്കുന്നത്. എ ശാന്തകുമാര്‍ ആണ് തിരക്കഥയും സംഭാഷണവും.
