സിജു വിത്സണ്‍ നായകനാകുന്ന സെയ്ഫ് ഇന്ന് തീയേറ്ററുകളിലെത്തിയിരിക്കുകയാണ്. വര്‍ത്തമാന കാലഘട്ടത്തിന്റെ ആവശ്യമായ ഒരു സുരക്ഷിത സമൂഹം സൃഷ്ടിക്കാനായി സിനിമയ്ക്ക് അപ്പുറത്തെയ്ക്ക് സഞ്ചരിക്കുന്ന ഒരു സിനിമയാണ് സെയ്‌ഫെന്ന് അണിയറപപ്രവര്‍ത്തകര്‍ വ്യക്തമാക്കുന്നു. കുടുംബക്കാഴ്ചയും പ്രണയവും പ്രതികാരവും രാഷ്ട്രീയവും ഒക്കെ ഉള്‍പ്പെടുത്തി അഭിനയ മുഹൂര്‍ത്തങ്ങള്‍ ഏറെ ചേര്‍ത്ത് വച്ച് കഥ പറയുമ്പോഴും സാങ്കേതിക മുന്നേറ്റത്തെ അറിഞ്ഞ് അവതരിപ്പിയ്ക്കുകയാണ് ചിത്രം. സിനിമ കഥയില്‍ മാത്രം ഒതുങ്ങാതെ ഭാവിയിലെയ്ക്ക് ചില സംഭാവനകള്‍ കൂടി നല്‍കുന്നു.
ചിത്രം നൂറിലധികം തിയേറ്ററുകളിലാണ് റിലീസ് ചെയ്യുന്നത്.. സിജു വിത്സന്‍, അനുശ്രീ, അപര്‍ണ ഗോപിനാഥ് എന്നിവരാണ് പ്രധാന താരങ്ങള്‍.
ഭാര്യ മരിച്ച ശ്രീധരന്‍ മാഷിന്റെയും രണ്ട് പെണ്‍മക്കളുടെയും കഥ പറയുന്നതോടൊപ്പം അവരെ ചുറ്റിപ്പറ്റിയുള്ള സംഭവ വികാസങ്ങളുമാണ് ചിത്രത്തെ മുന്നോട്ടു നയിക്കുന്നത്. മക്കളില്‍ മൂത്തവള്‍ ശ്വേതയ്ക്ക് ഡോക്ടറാകണമെന്നായിരുന്നു ആഗ്രഹം. ഇളയവള്‍ ശ്രേയയ്ക്ക് ഐപിഎസ് ഉദ്യോഗസ്ഥയാകാനും. കോളജില്‍ കലാതിലകം കൂടിയായ ശ്വേതയെ കോളജ് ഡേയ്ക്കിടെ കാണാതാകുന്നു.
പത്തു വര്‍ഷത്തോളം ശ്രീധരന്‍ മാഷ് മകള്‍ക്ക് വേണ്ടി അന്വേഷണം നടത്തിയെങ്കിലും യാതൊരു തുമ്പും കിട്ടിയില്ല. ഇതേസമയം, ശ്രേയ ഐപിഎസുകാരിയായി തീരുന്നു. ശ്രേയ നടത്തുന്ന രഹസ്യ അന്വേഷണം ചിത്രത്തിന് ത്രില്ലര്‍ മൂഡ് സമ്മാനിക്കുന്നു.
Read more
അജി ജോണ്‍, ഹരീഷ് പേരടി, പ്രസാദ് കണ്ണന്‍, ശിവജി ഗുരുവായൂര്‍, ഷാജി പല്ലാരിമംഗലം, സര്‍ജു മാത്യു, കൃഷ്ണ, ഊര്‍മിള ഉണ്ണി, അഞ്ജലി നായര്‍, ലക്ഷ്മിപ്രിയ, ഷെറിന്‍ ഷാജി, തന്‍വി കിഷോര്‍, ദിവ്യ പിള്ള, ഷിബില, സാവിയോ, ബിട്ടു തോമസ് തുടങ്ങി വന്‍താരനിര തന്നെ ചിത്രത്തിലുണ്ട്. ഷാജി പല്ലാരിമംഗലം കഥയൊരുക്കി എപിഫാനി എന്റര്‍ടൈന്‍മെന്റിന്റെ ബാനറില്‍ ഷാജി പല്ലാരിമംഗലം, സര്‍ജു മാത്യു എന്നിവര്‍ ചേര്‍ന്ന് നിര്‍മിക്കുന്ന ചിത്രം സ്ത്രീ കഥാപാത്രങ്ങള്‍ക്കും ഏറെ പ്രാധാന്യം നല്‍കുന്ന ചിത്രമാണ്.
