രജിഷ വിജയനും സുരാജ് വെഞ്ഞാറമ്മൂടും കേന്ദ്ര കഥാപാത്രങ്ങളായെത്തിയ “ഫൈനല്‍സി”നെ പ്രശംസിച്ച് നടി റിമ കല്ലിങ്കല്‍. രജിഷയും സുരാജും തങ്ങളുടെ കഥാപാത്രങ്ങളെ മികവോടെ അവതരിപ്പിച്ചെന്നാണ് റിമ പറയുന്നത്. സങ്കടവും ദേഷ്വവും തുടങ്ങി എല്ലാ ഇമോഷന്‍സും സുരാജ് മനോഹരമാക്കിയെന്നും റിമ പറയുന്നു.
“ആദ്യമായി സംവിധാനം ചെയ്യുന്നത് ഒരു സ്‌പോര്‍ട്‌സ് സിനിമ, ഒരുപാട് കഷ്ടപ്പാടുകളുണ്ടാകും എന്നാലും അരുണ്‍ നന്നായി ചെയ്തു. രജിഷയും സുരാജേട്ടനും തകര്‍ത്തു” എന്നാണ് റിമ പറയുന്നത്. ആലീസ് എന്ന അന്താരാഷ്ട്ര സൈക്ലിംഗ് താരമായാണ് രജിഷ എത്തുന്നത്. രജിഷയുടെ അച്ഛന്‍ വര്‍ഗീസായാണ് സുരാജ് വെഞ്ഞാറമൂട് എത്തുന്നത്.
നിരഞ്ജ്, ധ്രുവന്‍, ടിനി ടോം, കുഞ്ചന്‍, മാല പാര്‍വ്വതി, മുത്തുമണി എന്നിവര്‍ക്കൊപ്പം ചില കായിക താരങ്ങളും സിനിമയില്‍ അണിനിരക്കുന്നു. നവാഗതനായ പി ആര്‍ അരുണ്‍ സംവിധാനം ചെയ്ത ചിത്രം മണിയന്‍ പിളള രാജുവും പ്രജീവും ചേര്‍ന്നാണ് നിര്‍മ്മാണം. സുധീപ് ഇളമണ്‍ ഛായാഗ്രഹണം നിര്‍വ്വഹിച്ച ചിത്രത്തിന് സംഗീത സംവിധാനം കൈലാസ് മേനോനാണ്.
