രജനികാന്ത്-ലോകേഷ് കനകരാജ് കൂട്ടുകെട്ടിൽ റിലീസിനൊരുങ്ങുന്ന കൂലിക്കായുളള കാത്തിരിപ്പിലാണ് സിനിമാപ്രേമികൾ. ഓ​ഗസ്റ്റ് 14ന് തിയേറ്ററുകളിലെത്തുന്ന ചിത്രത്തിന്മേൽ വലിയ പ്രതീക്ഷകളാണ് എല്ലാവർക്കുമുളളത്. വമ്പൻ താരനിര അണിനിരക്കുന്ന കൂലിയുടേതായി പുറത്തിറങ്ങിയ ട്രെയിലറും പാട്ടുകളുമെല്ലാം സോഷ്യൽ മീഡിയയിൽ തരം​ഗമായിരുന്നു. രജനി ചിത്രത്തിന്റെ അഡ്വാൻസ് ബുക്കിങ് ഇന്ന് ആരംഭിച്ചിരിക്കുകയാണ്. കേരളത്തിൽ ഉൾപ്പെടെ മികച്ച പ്രതികരണമാണ് കൂലി ബുക്കിങ്ങിന് ലഭിക്കുന്നത്.

ബുക്കിങ് തുടങ്ങി ഒരു മണിക്കൂറിൽ ഒരു കോടി ചിത്രം നേടിയെന്നാണ് റിപ്പോർട്ടുകൾ. 64,000ത്തിലധികം ടിക്കറ്റുകൾ ഇതിനകം സിനിമയുടേതായി വിറ്റു പോയി. ടിക്കറ്റ് വില്പന ആരംഭിച്ചത് മുതൽ ബുക്കിങ് ആപ്പുകളിൽ ആരാധകരുടെ തിക്കും തിരക്കുമാണ്. ആദ്യം ദിവസം കേരളത്തിൽ നിന്ന് മാത്രം ചിത്രം നല്ല കലക്ഷൻ നേടുമെന്നാണ് റിപ്പോർട്ടുകൾ സൂചിപ്പിക്കുന്നത്. കൂലിയുടെ ആദ്യ പ്രദർശനം ഇന്ത്യൻ സമയം പുലർച്ചെ 4.01 ന് ആരംഭിക്കും. കേരളത്തിൽ രാവിലെ ആറ് മണി മുതലാണ് കൂലിയുടെ ഷോ തുടങ്ങുക.

കൂലിയിൽ ദേവ എന്ന കഥാപാത്രമായാണ് രജനികാന്ത് എത്തുക. തലൈവർക്കൊപ്പം മലയാളികളുടെ പ്രിയ താരം സൗബിൻ ഷാഹിറും ചിത്രത്തിൽ പ്രധാന വേഷത്തിൽ എത്തുന്നു. നാഗാർജുന, ഉപേന്ദ്ര, സത്യരാജ്, ശ്രുതി ഹാസൻ, റീബ മോണിക്ക ജോൺ എന്നിവരാണ് മറ്റ് താരങ്ങൾ. ആമിർ ഖാൻ അതിഥി വേഷത്തിൽ എത്തുന്നു. അനിരുദ്ധ് രവിചന്ദർ ആണ് പാട്ടുകൾ ഒരുക്കിയത്. ഗിരീഷ് ഗംഗാധരൻ ക്യാമറ കൈകാര്യം ചെയ്യുന്ന ചിത്രത്തിന്റെ എഡിറ്റിംഗ് ഫിലോമിൻ രാജ് ആണ്. സൺ പിക്ചേഴ്സിന്റെ ബാനറിൽ കലാനിധി മാരനാണ് കൂലിയുടെ നിർമ്മാണം. എച്ച്എം അസോസിയേറ്റ്സ് ആണ് സിനിമ കേരളത്തിൽ എത്തിക്കുന്നത്.