പൃഥ്വിരാജിനൊപ്പം ഹെലികോപ്ടറില്‍ പറന്ന് ആരാധിക. പൃഥ്വിരാജിന്റെ പുതിയ ചിത്രം ഡ്രൈവിംഗ് ലൈസന്‍സിന്റെ പ്രൊമോഷന്റെ ഭാഗമായി നടത്തിയ കോണ്ടസ്റ്റില്‍ വിജയിയായ ആരാധികയ്ക്കാണ് താരത്തിനൊപ്പം ആകാശയാത്രയ്ക്ക് അവസരം ലഭിച്ചത്. മത്സത്തില്‍ വിജയികളായ നാലുപേര്‍ക്കാണ് പൃഥ്വിക്കൊപ്പം ഹെലികോപ്റ്ററില്‍ പറക്കാനുള്ള ഭാഗ്യം ലഭിച്ചത്. ബിജിത ജനാര്‍ദനന്‍, ഹാരിസ് പാലത്, അരുണ്‍ കെ. ചെറിയാന്‍, ജിഷ്ണു രാജീവ് എന്നിവരാണ് വിജയികള്‍. കൊച്ചി, കോഴിക്കോട്, തിരുവനന്തപുരം, കൊല്ലം എന്നീ സ്ഥലങ്ങളിലൂടെയാകും ഹെലികോപ്റ്റര്‍ യാത്ര.
“9”ന് ശേഷം വീണ്ടും പൃഥ്വിരാജ് നിര്‍മ്മാതാവും നായകനുമായ ചിത്രമാണ് ഡ്രൈവിംഗ് ലൈസന്‍സ്. സൂപ്പര്‍സ്റ്റാറും ആരാധകനും തമ്മിലുള്ള ബന്ധത്തിന്റെ കഥ പറയുന്ന ചിത്രത്തില്‍ സൂപ്പര്‍താരമായി പൃഥ്വിരാജ് എത്തുന്നു. ആരാധകന്റെ വേഷത്തില്‍ സുരാജ് വെഞ്ഞാറമൂടാണ് അഭിനയിക്കുന്നത്. ക്രിസ്മസ് റിലീസായി തിയേറ്ററുകളിലെത്തിയ ചിത്രത്തിന് മികച്ച പ്രതികരണമാണ് ലഭിക്കുന്നത്.
Read more
സംവിധായകന്‍ ലാലിന്റെ മകന്‍ ജീന്‍ പോളാണ് ചിത്രം സംവിധാനം ചെയ്യുന്നത്. ലക്ഷ്വറി കാറുകളോട് ആഭിമുഖ്യമുള്ള സിനിമാതാരമായാണ് പൃഥ്വിരാജ് ചിത്രത്തിലെത്തുന്നത്. പൃഥിയുടെയും സുരാജിന്റെ കഥാപാത്രങ്ങള്‍ തമ്മിലുള്ള സംഘര്‍ഷങ്ങളാണ് ചിത്രത്തിന്റെ ആധാരം. ദീപ്തി സതി, മിയ ജോര്‍ജ് എന്നിവരാണ് നായികമാരായി എത്തുന്നത്. പൃഥിരാജിന്റെ ഭാര്യയായാണ് ദീപ്തി വേഷമിടുന്നത്. സച്ചി തിരക്കഥയൊരുക്കുന്ന ചിത്രത്തിന്റെ ഛായാഗ്രഹണം നിര്‍വ്വഹിക്കുന്നത് അലക്‌സ് ജെ പുളിക്കലാണ്. പൃഥിരാജ് പ്രൊഡക്ഷന്‍സിനൊപ്പം ലിസ്റ്റിന്‍ സ്റ്റീഫനും ചേര്‍ന്നാണ് ചിത്രം നിര്‍മ്മിച്ചത്.
