ക്രൂരനായ കുയ്യാലിയായി ഷമ്മി തിലകന്‍; തോറ്റവന്റെ അതിജീവനകഥയുമായി പടവെട്ട് നാളെ എത്തും

നിവിന്‍ പോളി നായകനായി എത്തുന്ന ഏറ്റവും പുതിയ ചിത്രം പടവെട്ട് നാളെ തീയേറ്ററുകളിലേക്ക് . ചിത്രത്തിലെ വില്ലന്‍ വേഷം അവതരിപ്പിക്കുന്നത് ഷമ്മി തിലകനാണ്. ഈ ചിത്രത്തില്‍ ഷമ്മി തിലകന്‍ അവതരിപ്പിക്കുന്ന കഥാപാത്രത്തിന്റെ പോസ്റ്റര്‍ ഇപ്പോള്‍ റിലീസ് ചെയ്തിരിക്കുകയാണ്.

തന്റെ ക്രൂരതകള്‍ കൊണ്ട് കുപ്രസിദ്ധനായ കുയ്യാലി എന്ന കഥാപാത്രമായാണ് ഷമ്മി തിലകന്‍ അഭിനയിച്ചിരിക്കുന്നത്. നിവിന്‍ കഥാപാത്രവും ഷമ്മി തിലകന്റെ കുയ്യാലിയും തമ്മിലുള്ള സംഘര്‍ഷമാകും ഈ ചിത്രത്തിന്റെ ഹൈലൈറ്റെന്നാണ് സൂചന. ചിത്രത്തിന്റെ ടീസര്‍, ട്രൈലെര്‍, ഇതിലെ രണ്ടു ഗാനങ്ങള്‍ എന്നിവയും വലിയ ശ്രദ്ധ നേടുകയും ഹൈപ്പ് കൂട്ടുകയും ചെയ്തിട്ടുണ്ട്.

നവാഗതനായ ലിജു കൃഷ്ണ രചിച്ചു സംവിധാനം ചെയ്ത ഈ ചിത്രം യുവ താരം സണ്ണി വെയ്ന്റെ സണ്ണി വെയ്ന്‍ പ്രൊഡക്ഷന്‍സ്, യോഡ്‌ലീ ഫിലിംസ് എന്നിവര്‍ ചേര്‍ന്നാണ് നിര്‍മ്മിച്ചിരിക്കുന്നത്. അരുവി എന്ന തമിഴ് ചിത്രത്തിലൂടെ ശ്രദ്ധ നേടിയ നടി അദിതി ബാലന്‍ നായികാ വേഷം ചെയ്ത പടവെട്ടില്‍ നിവിന്‍, അദിതി, ഷമ്മി തിലകന്‍ എന്നിവരെ കൂടാതെ. ഷൈന്‍ ടോം ചാക്കോ, ഇന്ദ്രന്‍സ്, വിജയരാഘവന്‍, കൈനകിരി തങ്കരാജ്, ബാലന്‍ പാറക്കല്‍, സുധീഷ് എന്നിവരും വേഷമിട്ടിരിക്കുന്നു.

ഒരു സോഷ്യല്‍ പൊളിറ്റിക്കല്‍ മാസ്സ് ആക്ഷന്‍ ത്രില്ലറായിരിക്കും പടവെട്ടെന്നാണ് ഇതുവരെ പുറത്തു വന്ന വിവരങ്ങള്‍ സൂചിപ്പിക്കുന്നത്. ദീപക് ഡി മേനോന്‍ ഛായാഗ്രഹണം നിര്‍വഹിച്ച ഈ ചിത്രം എഡിറ്റ് ചെയ്തത് ഷെഫീഖ് മുഹമ്മദ് അലിയും ഇതിനു സംഗീതമൊരുക്കിയത് ഗോവിന്ദ് വസന്തയുമാണ്.