ചാക്കോച്ചന്റെ കേസ് ഒരു ദിവസം മുൻപേ എടുക്കും; 'ന്നാ താൻ കേസ് കൊട്'; പുതിയ റിലീസ് തിയതി പ്രഖ്യാപിച്ചു

രതീഷ് ബാലകൃഷ്ണ പൊതുവാളിന്റെ സംവിധനത്തിൽ കുഞ്ചാക്കോ ബോബൻ നായകനാകുന്ന പുതിയ ചിത്രം ‘ന്നാ താൻ കേസ് കൊട്’ ഓഗസ്റ്റ് 11ന് റിലീസ് ചെയ്യും. ലോകമെമ്പാടുമുള്ള തിയറ്ററുകളില്‍ ചിത്രം ഓഗസ്റ്റ് 12ന് എത്തുമെന്നാണ് അണിയറക്കാര്‍ അറിയിച്ചിരുന്നത്. എന്നാല്‍ ഇപ്പോഴിതാ റിലീസ് തീയതിയില്‍ ഒരു ചെറിയ മാറ്റം വരുത്തിയിരിക്കുകയാണ് നിര്‍മ്മാതാക്കള്‍.

മുന്‍പ് പ്രഖ്യാപിച്ചിരുന്നതിലും ഒരു ദിവസം നേരത്തെ, അതായത് ഓഗസ്റ്റ് 11ന് ചിത്രം പ്രേക്ഷകര്‍ക്കു മുന്നിലെത്തും. ഗായത്രി ശങ്കറാണ് ചിത്രത്തിൽ നായികയായെത്തുന്നത്. ഗായത്രിയുടെ ആദ്യ മലയാളം സിനിമ കൂടിയാണ്  ‘ന്നാ താൻ കേസ് കൊട്’.

‘നടുവിലെ കൊഞ്ചം പക്കത്തെ കാണോം’, ‘സൂപ്പർ ഡീലക്‌സ്’, ‘വിക്രം’ എന്നീ തമിഴ് ചിത്രങ്ങളിൽ ഗായത്രി ശങ്കർ അഭിനയിച്ചിട്ടുണ്ട്. ചിത്രത്തിൽ കാസർഗോഡ് നിവാസികളായ ഒട്ടേറെ പുതുമുഖങ്ങളും അണിനിരക്കുന്നുണ്ട്.


സന്തോഷ് ടി കുരുവിളയും കുഞ്ചാക്കോ ബോബനും ചേർന്നാണ് ചിത്രം നിർമ്മിക്കുന്നത്. ചിത്രത്തിന്റെ ഛായാഗ്രാഹണം രാകേഷ് ഹരിദാസ് നിർവ്വഹിക്കുന്നു. സംഗീതം ഡോൺ വിൻസന്റ് ഗാന രചന വൈശാഖ് സുഗുണൻ. സൗണ്ട് ഡിസൈനർ ശ്രീജിത്ത് ശ്രീനിവാസൻ , മിക്സിംഗ് വിപിൻ നായർ.