നിത്യ മേനോൻ്റെ വരാനിരിക്കുന്ന ചിത്രമായ ‘ഡിയർ എക്സസ്’സിന്റെ ഫസ്റ്റ് ലുക്ക് പോസ്റ്റർ പുറത്തിറങ്ങി. താരത്തിന്റെ ജന്മദിനം പ്രമാണിച്ച് ഇന്നലെയാണ് ടൈറ്റിൽ പുറത്തു വിട്ടത്. സംവിധായിക കാമിനിയുടെ ആദ്യ ഫീച്ചർ സിനിമയാണിത്.
ഒരു കൈയിൽ ഒരു ഗ്ലാസ് പാനീയവും മറ്റൊരു കൈയിൽ മൊബൈൽ ഫോണും പിടിച്ചിരിക്കുന്ന പരമ്പരാഗത ലുക്കിലുള്ള നിത്യയെ ആണ് ഫസ്റ്റ് ലുക്ക് പോസ്റ്ററിൽ ഉള്ളത്. ‘മാജിക് ആരംഭിക്കട്ടെ’ എന്നതാണ് ചിത്രത്തിൻ്റെ ടാഗ്‌ലൈൻ.
View this post on Instagram
നേരത്തെ സംവിധായകൻ വിഷ്ണു വർദ്ധനൊപ്പം അസിസ്റ്റൻ്റായി പ്രവർത്തിച്ച കാമിനിയാണ് ഡിയർ എക്സെസ് സംവിധാനം ചെയ്യുന്നത്. ഒരു ഫാൻ്റസി റൊമാൻ്റിക് കോമഡിയായിരിക്കും ചിത്രം എന്നാണ് സൂചന. പ്രതീക് ബബ്ബർ, വിനയ് റായ്, നവ്ദീപ്, ദീപക് പറമ്പോൾ എന്നിവരും പ്രധാന കഥാപാത്രങ്ങളെ അവതരിപ്പിക്കും. ദീപക് പറമ്പോലിന്റെ ആദ്യ തമിഴ് സിനിമയാണിത്. ചിത്രത്തിലെ പ്രധാന കഥാപാത്രങ്ങളിലൊന്നായാണ് ദീപക് പറമ്പോൾ എത്തുക.
പ്രണയത്തിൽ ഭാഗ്യമില്ലാത്ത ഒരു പെൺകുട്ടിയായാണ് ചിത്രത്തിൽ നിത്യ മേനൻ എത്തുന്നത് എന്നാണ് സൂചന. പ്രീത ജയരാമൻ ഛായാഗ്രഹണവും ഷൺമുഖരാജ കലാസംവിധാനവും നിർവ്വഹിക്കുന്നു. ബിജിഎൻ, ആദിത്യ അജയ് സിംഗ്, രാംകി എന്നിവരാണ് നിർമ്മാതാക്കൾ.
2022ൽ ധനുഷ് നായകനായ തിരുച്ചിത്രമ്പലത്തിലാണ് നിത്യ മേനോൻ അവസാനമായി അഭിനയിച്ചത്. ജയം രവിയ്‌ക്കൊപ്പം മറ്റൊരു റൊമാൻ്റിക് ചിത്രമായ കാതലിക്ക നേരമില്ലയിലും നിത്യ അഭിനയിക്കും. ധനുഷിനൊപ്പം രായണിലും താരം അഭിനയിക്കുന്നുണ്ട്.
