സ്വന്തം സിനിമയുടെ ട്രെയ്ലര് കണ്ട് ആവേശപുളകിതനായി തെലുങ്ക് താരം നന്ദമൂരി ബാലകൃഷ്ണ. ‘അഖണ്ഡ 2’ എന്ന പുതിയ ചിത്രത്തിന്റെ ട്രെയ്ലര് ലോഞ്ചിനിടെയുള്ള ബാലകൃഷ്ണയുടെ ഭാവമാറ്റങ്ങളാണ് സോഷ്യല് മീഡിയയുടെ ശ്രദ്ധ നേടിയിരിക്കുന്നത്. തന്റെ അഭിനയം ആവേശത്തോടെയും അത്ഭുതത്തോടെയുമാണ് ബാലയ്യ കാണുന്നത്.
ട്രെയിലറിലെ ഡയലോഗിന് അനുസരിച്ച് ബാലകൃഷ്ണ തലയാട്ടുകയും ആവേശം കൊള്ളുകയും ചെയ്യുന്നുണ്ട്. അതിശയത്തോടെ ആര്ത്തുവിളിക്കുന്നതും വീഡിയോയില് കാണാം. മലയാളി താരം സംയുക്ത മേനോനും അരികിലുണ്ട്. സ്വന്തം കഴിവുകണ്ട് കണ്ണുതള്ളിയ കലാകാരന് എന്നാണ് വീഡിയോക്ക് വന്ന ഒരു പ്രതികരണം.
#Akhanda2 Trailer reaction video பலர் விடலாம்.. ஆனா பாலையாகிட்ட இருந்தே 👀🔥😂
— Prakash Mahadevan (@PrakashMahadev) November 23, 2025
കുട്ടികളുടെ മനസാണ് അയ്യയ്ക്ക്, ട്രെയിലറിന്റെ ഫൈനല് ഔട്ട്പുട്ട് ഇപ്പോഴായിരിക്കും കാണുന്നത്, എന്നെ സമ്മതിക്കണം എന്നെല്ലാമാണ് ട്രോളര്മാരുടെ പ്രതികരണം. ശ്രീനിവാസന് അവതരിപ്പിച്ച സരോജ് കുമാര് എന്ന കഥാപാത്രത്തെ ഓര്മ്മ വന്നുവെന്നും പ്രേക്ഷകര് കമന്റ് ചെയ്യുന്നുണ്ട്.
നന്ദമൂരി ബാലകൃഷ്ണ നായകനായെത്തുന്ന അഖണ്ഡ 2 ചിത്രത്തിന്റെ ട്രെയ്ലര് കഴിഞ്ഞ ദിവസമാണ് പുറത്തിറങ്ങിയത്. സംയുക്ത മേനോന് ആണ് ചിത്രത്തിലെ നായിക. 2021ല് റിലീസ് ചെയ്ത ‘അഖണ്ഡ’ എന്ന സിനിമയുടെ രണ്ടാം ഭാഗമായാണ് ‘അഖണ്ഡ 2 താണ്ഡവം’ എത്തുന്നത്. ബോയപതി ശ്രീനുവാണ് ചിത്രത്തിന്റെ സംവിധായകന്.
Read more
ബോയപതി-നന്ദമുരി ബാലകൃഷ്ണ ടീം ഒന്നിക്കുന്ന നാലാമത്തെ ചിത്രമാണിത്. അഖണ്ഡ ഒന്നാം ഭാഗം പോലെ തന്നെ പൊടിപാറുന്ന സംഘട്ടന രംഗങ്ങളാകും സിനിമയുടെ ഹൈലൈറ്റ്. പാന് ഇന്ത്യന് ചിത്രമായി ബ്രഹ്മാണ്ഡ ബഡ്ജറ്റില് ഒരുക്കുന്ന ചിത്രത്തിലെ വില്ലന് വേഷം അവതരിപ്പിക്കുന്നത് ആദി പിന്നിസെട്ടിയാണ്. ബോളിവുഡ് താരം ഹര്ഷാലി മല്ഹോത്രയും ചിത്രത്തിന്റെ താരനിരയിലുണ്ട്. ഡിസംബര് 5ന് ചിത്രം തിയേറ്ററിലെത്തും.
