പുതുമുഖങ്ങളെ കേന്ദ്ര കഥാപാത്രങ്ങളാക്കി മോഹിത് സൂരി സംവിധാനം ചെയ്ത ബോളിവുഡ് ചിത്രം സൈയാര തിയേറ്ററുകളിൽ തരംഗം സൃഷ്ടിച്ച് മുന്നേറുകയാണ്. ജൂലൈ 18 ന് റിലീസ് ചെയ്ത ചിത്രത്തിന് മികച്ച പ്രേക്ഷക സ്വീകാര്യതയാണ് ലഭിച്ചത്. മ്യൂസിക്കൽ റൊമാൻറിക് ഡ്രാമ ഗണത്തിൽപെട്ട ചിത്രം യുവതലമുറയാണ് കൂടുതലായും ഏറ്റെടുത്തിരിക്കുന്നത്. നവാഗതരായ അഹാൻ പാണ്ഡേ, അനീത് പഡ്ഡ എന്നിവരാണ് ചിത്രത്തിൽ പ്രധാന വേഷങ്ങളിൽ എത്തുന്നത്. മൗത്ത് പബ്ലിസിറ്റിയിലൂടെയാണ് ചിത്രം തിയേറ്ററുകളിൽ സർപ്രൈസ് ഹിറ്റായി മാറിയത്. ബോക്സോഫിസ് കലക്ഷന്റെ കാര്യത്തിലും വലിയ നേട്ടമുണ്ടാക്കിയിരിക്കുകയാണ് സൈയാര.

എറ്റവും പുതിയ റിപ്പോർട്ടുകൾ പ്രകാരം മോഹിത് സൂരി ചിത്രം 300 കോടി ക്ലബിനടുത്ത് എത്തിയിരിക്കുകയാണ്. പ്രമുഖ ട്രാക്കർമാരായ സാക്നിൽകിൻറെ കണക്ക് അനുസരിച്ച് ചിത്രം ഇന്ത്യയിൽ നിന്ന് ഇതിനകം നേടിയിരിക്കുന്ന നെറ്റ് കളക്ഷൻ 217.25 കോടിയാണ്. ഗ്രോസ് 228.9 കോടിയും. വിദേശ മാർക്കറ്റുകളിൽ നിന്ന് ഇതിനകം നേടിയിട്ടുള്ളത് 52.85 കോടിയുമാണ്. അങ്ങനെ ആഗോള ബോക്സോഫിസിൽ നിന്ന് സൈയാര ആകെ നേടിയിട്ടുള്ളത് 281.75 കോടി രൂപയാണ്.

ഒൻപതാം ദിനമായ ഇന്നലെ മാത്രം ഇന്ത്യയിൽ നിന്ന് സിനിമ നെറ്റ് കളക്ഷനായി 26.5 കോടി നേടി. ഇന്നും സമാന രീതിയിൽ കലക്റ്റ് ചെയ്യുകയാണെങ്കിൽ സൈയാര 300 കോടി ക്ലബ്ബിലേക്ക് കയറും. ഈ വർഷം 300 കോടി ക്ലബിൽ കയറുന്ന രണ്ടാമത്തെ ഇന്ത്യൻ ചിത്രമായിരിക്കും സൈയാര. ബോളിവുഡ് സിനിമ ഛാവ മാത്രമാണ് ഈ വർഷം ആ നേട്ടം സ്വന്തമാക്കിയിട്ടുള്ളത്. ഇന്ത്യയിൽ നിന്ന് മാത്രം 693 കോടി നേടിയിരുന്നു ഛാവ. അതേസമയം എമ്പുരാൻറെ ആഗോള കളക്ഷൻ സയ്യാര ഇതിനോടം മറികടന്നിട്ടുണ്ട്. മോഹൻലാൽ ചിത്രം ലോകമെമ്പാടുനിന്നും 265 കോടിയോളം രൂപയാണ് കലക്ട് ചെയ്തിരുന്നത്.