മലയാള സിനിമാ ലോകത്തിന് ഇന്ന് 68 തികയുന്ന പതിനെട്ടുകാരന്റെ ദിവസമാണ്. മലയാളത്തിന്റെ പ്രിയനടന്‍ മമ്മൂട്ടിയുടെ ജന്മദിനമാണ് ഇന്ന്. പിറന്നാല്‍ ആശംസയുമായി താരങ്ങളും ആരാധകരും. സോഷ്യല്‍ മീഡിയയില്‍ അത്തപ്പൂക്കളമിട്ട കണക്ക് ആശംസകളും ചിത്രങ്ങളും. മലയാള സിനിമാ ലോകം ഒന്ന് നിന്ന് ജന്മദിനം ആഘോഷമാക്കുമ്പോള്‍ എരിതീയില്‍ എണ്ണയൊഴിച്ച് മമ്മൂട്ടിയുടെ സര്‍പ്രൈസ് എത്തി. മാമാങ്കത്തിലെ തന്റെ പുതിയ ലുക്ക് മമ്മൂട്ടി സോഷ്യല്‍ മീഡിയയിലൂടെ പങ്കുവെച്ചു. നിമിഷ നേരം കൊണ്ടാണ് ചിത്രം സോഷ്യല്‍ മീഡിയയില്‍ വൈറലായിരിക്കുന്നത്.
സാമൂതിരി കാലഘട്ടത്തിലെ വീരന്മാരായ ചാവേറുകളുടെ പോരാട്ടത്തിന്റെ ചരിത്രം പറയുന്ന മമ്മൂട്ടിയുടെ ബിഗ് ബജറ്റ് ചരിത്ര സിനിമയാണ് മാമാങ്കം. ഇന്ത്യന്‍ സിനിമയിലെ ഏറ്റവും വലിയ സെറ്റ് വര്‍ക്കുകളിലൊന്നാണ് മാമാങ്കത്തിനായി ഒരുങ്ങിയത്. കാവ്യ ഫിലിം കമ്പനിയുടെ ബാനറില്‍ പ്രവാസി വ്യവസായിയായ വേണു കുന്നപ്പള്ളിയാണ് മാമാങ്കം നിര്‍മ്മിക്കുന്നത്.
Read more
എം. പത്മകുമാര്‍ സംവിധാനം ചെയ്യുന്ന ചിത്രത്തില്‍ സിദ്ധിഖ്, തരുണ്‍ അറോറ, സുദേവ് നായര്‍, മണികണ്ഠന്‍, സുരേഷ് കൃഷ്ണ, മാസ്റ്റര്‍ അച്യുതന്‍ തുടങ്ങിയവരും അഭിനയിക്കുന്നുണ്ട്. പ്രാചി തെഹ്ലാന്‍, അനു സിത്താര, കനിഹ, ഇനിയ എന്നിവരാണ് ചിത്രത്തിലെ നായികമാര്‍.
