ഗംഭീര തിരിച്ചുവരവ് നടത്തി കാറപകടത്തില്‍ പരിക്കേറ്റ് വിശ്രമത്തിലായിരുന്ന മിമിക്രി താരം മഹേഷ് കുഞ്ഞുമോന്‍. ജയിലറിന്റെ മിമിക്രി സ്പൂഫ് വീഡിയോയുമായാണ് മഹേഷ് എത്തിയിരിക്കുന്നത്. സിനിമയിലെ താരങ്ങളുടെ ശബ്ദം പുതിയ വീഡിയോയില്‍ അനുകരിക്കുന്നുണ്ട്.
രണ്ട് മാസത്തോളം നീണ്ട ഇടവേളക്ക് ശേഷമാണ് തന്റെ യുട്യൂബ് ചാനലില്‍ താരങ്ങളെ അനുകരിച്ച് മഹേഷ് രംഗത്തെത്തിയത്. വിനായകന്‍, ബാല, ആറാട്ടണ്ണന്‍ എന്നിവരെ അനുകരിക്കുന്ന വിഡിയോ ഏറെ സന്തോഷത്തോടെയും അഭിനന്ദനങ്ങളോടെയും ഏറ്റെടുത്തിരിക്കുകയാണ് മലയാളികള്‍. ഇതിനകം രണ്ട് ലക്ഷത്തിലധികം ആളുകള്‍ വീഡിയോ കണ്ടു കഴിഞ്ഞു. യൂട്യൂബ് ട്രെന്‍ഡിംഗിലും അഞ്ചാമതുണ്ട്.
ഇപ്പോഴും ചികിത്സ തുടരുകയാണെന്നും മഹേഷ് വിഡിയോയുടെ തുടക്കത്തില്‍ പറഞ്ഞു. ഇനിയും ശസ്ത്രക്രിയകള്‍ ബാക്കിയുണ്ടെന്നും വീട്ടിലിരിക്കുമ്പോള്‍ മിമിക്രി പ്രാക്ടീസ് ചെയ്യാറുണ്ടായിരുന്നെന്നും മഹേഷ് പറഞ്ഞു.
നടനും മിമിക്രി കലാകാരനുമായ കൊല്ലം സുധിയുടെ മരണത്തിനിടയാക്കിയ വാഹനാപകടത്തില്‍ പരിക്കേറ്റവരില്‍ ഒരാളായിരുന്നു മിമിക്രി കലാകാരന്‍ മഹേഷ് കുഞ്ഞുമോന്‍. മുഖത്തും കയ്യിലും സാരമായി പരിക്കുകളോടെയാണ് മഹേഷിനെ ആശുപത്രിയില്‍ പ്രവേശിപ്പിച്ചത്. രണ്ട് ആഴ്ചകള്‍ നീണ്ട ആശുപത്രി വാസത്തിന് ശേഷമാണ് മഹേഷ് ജീവിതത്തിലേക്ക് മടങ്ങി വന്നത്. പല്ലുകള്‍ തകരുകയും മൂക്കിനും മുഖത്തിനും ക്ഷതമേല്‍ക്കുകയും ചെയ്തിരുന്നു.
Read more
