‘ജവാന്‍’ ചിത്രത്തിന്റെ ട്രെയ്‌ലര്‍ സോഷ്യല്‍ മീഡിയയില്‍ ട്രെന്‍ഡിംഗ് ആയിരിക്കുകയാണ്. 20 മില്യണ്‍ ആളുകളാണ് ഇതുവരെ ട്രെയ്‌ലര്‍ കണ്ടിരിക്കുന്നത്. വേറിട്ട നാല് ഗെറ്റപ്പുകളിലാണ് ഷാരൂഖ് ഖാന്‍ ട്രെയ്‌ലറില്‍ പ്രത്യക്ഷപ്പെട്ടിരിക്കുന്നത്. അതുപോലെ തന്നെ വില്ലനായി എത്തുന്ന വിജയ് സേതുപതിയുടെ വ്യത്യസ്ത ലുക്കുകളും ട്രെയ്‌ലറില്‍ കാണിക്കുന്നുണ്ട്.
നര വീണ താടിയും മുടിയും കണ്ണടയുമൊക്കെയായി വേറിട്ട ലുക്കിലും വിജയ് സേതുപതി ട്രെയ്‌ലറില്‍ എത്തുന്നുണ്ട്. സേതുപതിയുടെ ഈ ലുക്കിനെ ഹരിശ്രീ അശോകന്റെ ഒരു സിനിമയിലെ ലുക്കുമായി താരതമ്യം ചെയ്തു കൊണ്ടുള്ള ട്രോളുകളാണ് ഇപ്പോള്‍ ശ്രദ്ധ നേടുന്നത്.
‘കൊച്ചി രാജാവ്’ എന്ന ചിത്രത്തിലെ ഹരിശ്രീ അശോകന്റെ ലുക്കുമായി ബന്ധപ്പെടുത്തിയാണ് ട്രോളുകള്‍ എത്തുന്നത്. ‘ഒരമ്മ പെറ്റ അളിയന്മാര്‍ ആണന്നെ പറയൂ’, ‘സൂക്ഷിച്ചു നോക്കേണ്ട ഉണ്ണി ഇതു ഞാനല്ല’ എന്നിങ്ങനെയാണ് ട്രോളിന് നല്‍കിയ ക്യാപ്ഷനും കമന്റുകളും.
View this post on Instagram
അതേസമയം, നയന്‍താരയാണ് ജവാനിലെ നായിക. നയന്‍താരയുടെ ബോളിവുഡ് അരങ്ങേറ്റ ചിത്രമാണിത്. ദീപിക പദുക്കോണ്‍ കാമിയോ റോളിലെത്തുന്നുണ്ട്. പ്രിയാമണി, സന്യ മല്‍ഹോത്ര എന്നിവരാണ് മറ്റ് അഭിനേതാക്കള്‍. റെഡ് ചില്ലീസ് എന്റര്‍ടെയ്ന്‍മെന്റിന്റെ ബാനറില്‍ ഗൗരി ഖാന്‍ ആണ് നിര്‍മാണം.
ചിത്രം സെപ്റ്റംബര്‍ ഏഴിന് റിലീസ് ചെയ്യും. ഹിന്ദി, തമിഴ്, തെലുങ്ക് ഭാഷകളിലാണ് ചിത്രം റിലീസിന് എത്തുന്നത്. ‘പഠാന്‍’ ചിത്രത്തിന്റെ വിജയം ജവാനും ആവര്‍ത്തിക്കുമെന്ന പ്രതീക്ഷയിലാണ് ഷാരൂഖ് ആരാധകര്‍.
