ഓസ്‌കര്‍ 2025 ചുരുക്കപട്ടികയില്‍ നിന്നും ഔദ്യോഗിക എന്‍ട്രിയായ ‘ലാപത ലേഡീസ്’ പുറത്തായെങ്കിലും പ്രതീക്ഷ നഷ്ടപ്പെടാതെ ഇന്ത്യ. ‘അനുജ’ എന്ന ചിത്രത്തിലാണ് ഇനി ഇന്ത്യയുടെ മുഴുവന്‍ പ്രതീക്ഷയും. ഗുനീത് മോങ്ക നിര്‍മ്മിച്ച അനുജ ലൈവ് ആക്ഷന്‍ ഹ്രസ്വചിത്ര വിഭാഗത്തിലാണ് ഷോര്‍ട് ലിസ്റ്റ് ചെയ്യപ്പെട്ടിരിക്കുന്നത്.
വസ്ത്ര വ്യാപാര മേഖലയിലെ ബാലവേലയെ കുറിച്ച് പറയുന്ന അനൂജ ഇതുവരെ നിരവധി പുരസ്‌കാരങ്ങള്‍ കരസ്ഥമാക്കിയിട്ടുണ്ട്. ഡല്‍ഹിയിലെ വസ്ത്ര നിര്‍മ്മാണ ഫാക്ടറിയില്‍ ജോലി ചെയ്യുന്ന ഒമ്പത് വയസ്സുകാരി അനുജ, 17 വയസ്സുകാരി പലക് എന്നിവരുടെ കഥയാണ് ചിത്രം പറയുന്നത്.
ഒരിക്കല്‍ ഫാക്ടറി സന്ദര്‍ശിച്ച ഒരു സാമൂഹിക പ്രവര്‍ത്തക അനുജയെയും സഹോദരിയെയും ഫാക്ടറിയില്‍ കാണുകയും ഇവിടെ നിന്ന് രക്ഷപ്പെടാനുള്ള വഴിയൊരുക്കുകയും ചെയ്യുന്നു. പ്രശസ്തമായ ഒരു ബോര്‍ഡിങ് സ്‌കൂളില്‍ പഠിക്കാനുള്ള പരീക്ഷ എഴുതാന്‍ അവസരമൊരുക്കുന്നതും ഇതിനായി സഹോദരികള്‍ നടത്തുന്ന പോരാട്ടവുമാണ് ചിത്രം.
ഗുനീത് മോങ്കയുടെ നിര്‍മ്മാണത്തില്‍ ഇത് ഓസ്‌കര്‍ നോമിനേഷന്‍ നേടുന്ന മൂന്നാമത്തെ ചിത്രമാണിത്. ദ എലിഫന്റ് വിസ്പറേര്‍സ്, പിരീഡ് എന്‍ഡ് ഓഫ് സെന്റന്‍സ് എന്നിവയായിരുന്നു നേരത്തെ ഓസ്‌കര്‍ പുരസ്‌കാരം നേടിയത്. സന്ധ്യ സൂരി സംവിധാനം ചെയ്ത ‘സന്തോഷ്’ എന്ന ഹിന്ദി ചിത്രം യുകെയുടെ ഔദ്യോഗിക എന്‍ട്രിയായി മത്സരത്തിനുണ്ട്.
Read more
