ലൂസിഫർ 'മെരിച്ചു'; ട്രോളുകളില്‍ മുങ്ങി ചിരഞ്ജീവിയുടെ ഗോഡ്ഫാദര്‍

ട്രോളുകളിൽ നിറഞ്ഞ് ‘ഗോഡ്ഫാദറിന്റെ’ ടീസര്‍. ചിരഞ്ജീവി നായകനായെത്തുന്ന ചിത്രം ​ഗോഡ്ഫാദറിന്റെ ടീസർ കഴിഞ്ഞ ദിവസമാണ് പുറത്തിറങ്ങിയത്. ടീസറിന് പിന്നാലെ സോഷ്യൽ മീഡിയയിൽ ട്രോളുകളും സജീവമാകുകയായിരുന്നു. മോഹന്‍ലാല്‍, പൃഥ്വിരാജ് കൂട്ടുകെട്ടില്‍ ഒരുങ്ങിയ ബ്ലോക്ക്ബസ്റ്റര്‍ ചിത്രം ലൂസിഫറിന്റെ തെലുങ്ക് റീമേയ്ക്കാണ് ഗോഡ്ഫാദര്‍.

മോഹന്‍ലാല്‍ അവതരിപ്പിച്ച സ്റ്റീഫന്‍ നെടുമ്പള്ളി എന്ന കഥാപാത്രമായി തെലുങ്കില്‍ ചിരഞ്ജീവിയും പൃഥ്വിരാജ് അവതരിപ്പിച്ച സയീദ് മസൂദ് എന്ന കഥാപാത്രമായി സല്‍മാന്‍ ഖാനുമാണ് ചിത്രത്തിലെത്തുന്നത്. സല്‍മാന്‍ ഖാനും ചിരഞ്ജീവിയും ഒരു കാറില്‍ മതില്‍ തകര്‍ത്തുവരുന്ന രംഗമാണ് ഏറ്റവും കൂടുതല്‍ ട്രോള്‍ നേരിടുന്നത്.

സല്‍മാന്റെയും ചിരഞ്ജീവിയുടെയും തല വെട്ടിയെടുത്ത് ഒട്ടിച്ചത് പോലെയുണ്ടെന്നും അല്‍പ്പം കടന്നുപോയില്ലേ എന്നുമാണ് സോഷ്യൽ മീഡിയയിൽ നേരിടുന്ന വിമര്‍ശനം. ചിത്രത്തിൽ മഞ്ജുവാര്യര്‍ അവതരിപ്പിച്ച പ്രിയദര്‍ശിനി രാംദാസ് എന്ന കഥാപാത്രമായി തെലുങ്കില്‍ എത്തുന്നത് നയന്‍താരയാണ്. നടന്‍ സുനിലാണ് കലാഭവന്‍ ഷാജോണിന്റെ വേഷത്തിലെത്തുന്നത്.

ജയം മോഹന്‍രാജയാണ് ചിത്രം സംവിധാനം ചെയ്യുന്നത്. നീരവ് ഷാ ആണ് ഛായാഗ്രഹണം. എസ് തമന്‍ ആണ് സംഗീതം. സില്‍വയാണ് സംഘട്ടന സംവിധായകന്‍. ലൂസിഫറിന്റെയും സംഘട്ടനം സംവിധാനം ചെയ്തത് സില്‍വയായിരുന്നു.