തന്നെ മനപൂര്‍വ്വം അപായപ്പെടുത്താന്‍ ശ്രമിക്കുന്നതായി നടന്‍ ബാലയുടെ മുന്‍ഭാര്യ ഡോക്ടര്‍ എലിസബത്ത് ഉദയന്‍. കാറില്‍ യാത്ര ചെയ്യവേ മനഃപൂര്‍വം ആരോ തന്റെ കാറില്‍ മറ്റൊരു വണ്ടി കൊണ്ടുവന്ന് ഇടിച്ചുവെന്നും കാര്യം അന്വേഷിക്കാനായി വണ്ടി നിര്‍ത്തിയപ്പോള്‍ വീണ്ടും ഇടിച്ചെന്നുമാണ് എലിസബത്ത് പറയുന്നത്. എലിസബത്ത് പങ്കുവച്ച പുതിയ വീഡിയോയിലാണ് ഇക്കാര്യം പറഞ്ഞത്. കൂടാതെ ബാല വിഷയത്തില്‍ തന്നെ പിന്തുണച്ചെത്തിയ അമൃത സുരേഷിന്റെ സഹോദരി അഭിരാമിയെ പേരെടുത്ത് പറയാതെ എലിസബത്ത് വിമര്‍ശിക്കുകയും ചെയ്തു. തന്നെ ആരും സപ്പോര്‍ട്ട് ചെയ്യണമെന്നില്ല, താന്‍ അനുഭവിച്ചത് ഇനിയാരും അനുഭവിക്കരുത് എന്നും എലിസബത്ത് വ്യക്തമാക്കി.
എലിസബത്തിന്റെ വാക്കുകള്‍:
ഇന്ന് ഞാന്‍ കാറില്‍ വരുന്ന സമയത്ത് ഒരാള്‍ ഒരു വണ്ടി കൊണ്ട് വന്നു ഞങ്ങളുടെ വണ്ടിയില്‍ ഇടിപ്പിച്ചു. ഇത് എന്നെ പേടിപ്പിക്കാന്‍ ആരെങ്കിലും ചെയ്തതാണോ എന്നൊന്നും അറിയില്ല. ഒരു തവണ ഇടിച്ചാല്‍ അറിയാതെ ചെയ്തതാണെന്ന് കരുതാം. ഇത് രണ്ട്-മൂന്ന് തവണ വന്നു ഇടിച്ചു. ഒരു തവണ ഇടിച്ചപ്പോള്‍ വണ്ടി നിര്‍ത്തി, ചോദിച്ചു കൊണ്ടിരുന്നപ്പോള്‍ വീണ്ടും ഇടിച്ചു, അത് കഴിഞ്ഞു മൂന്നാം തവണയും ഇടിച്ചു. ഇടിച്ചത് ക്ലോസ് റേഞ്ചില്‍ ആയതുകൊണ്ടും അതൊരു ചെറിയ വണ്ടിയായത് കാരണവും ഞങ്ങളുടെ വണ്ടിക്ക് കാര്യമായ കുഴപ്പമൊന്നും സംഭവിച്ചില്ല. അയാളുടെ ബമ്പര്‍ വന്നു ഞങ്ങളുടെ ടയറിന് മുകളില്‍ ആണ് ഇടിച്ചത്. ഒന്നുകില്‍ അയാള്‍ ബോധമില്ലാതെ ആണ് വണ്ടി ഓടിക്കുന്നത് അല്ലെങ്കില്‍ അതൊരു ഭീഷണി തന്നെയാണ്. എന്തായാലും ഇങ്ങനെ ഒക്കെ സംഭവങ്ങള്‍ നടക്കുന്നുണ്ട് എന്ന് നിങ്ങളെ അറിയിക്കാന്‍ ആണ് ഞാന്‍ പറഞ്ഞത്.
അത് ഒരു ഭീഷണി ആണോ അതോ ഇത്രയും വണ്ടി ഓടിക്കാന്‍ അറിയാത്ത ആളാണോ വണ്ടി ഓടിക്കുന്നത് എന്ന് അറിയില്ല. മൂന്ന് തവണ സിംപിള്‍ ആയി വെറുതെ കൊണ്ട് വേറൊരു വണ്ടിയില്‍ ഇടിക്കേണ്ട കാര്യമില്ല. എന്തായാലും എനിക്ക് കുഴപ്പമൊന്നും സംഭവിച്ചിട്ടില്ല ഞാന്‍ ഇതുവരെ സുരക്ഷിതയാണ്. കുറച്ച് ദിവസമായി കടുത്ത മാനസിക വിഷമത്തില്‍ ആയത് കാരണം ആണ് വീഡിയോ ചെയ്യാതിരുന്നത്. ഞാന്‍ വീഡിയോ ചെയ്യുന്നത് എനിക്ക് നീതി കിട്ടും എന്ന് കരുതി അല്ല. മറിച്ച് ഞാന്‍ ചത്താലും ഇതൊക്കെ എല്ലാവരും അറിയണം എന്നുള്ളതു കൊണ്ടാണ്. എന്റെ വീഡിയോയ്ക്ക് സപ്പോര്‍ട്ട് ചെയ്തു വിഡിയോ ഇട്ട പലര്‍ക്കും ഭീഷണി വരികയും പലര്‍ക്കും കോപ്പിറൈറ്റ് സ്‌ട്രൈക്ക് കിട്ടുകയും ചെയ്തു എന്നറിഞ്ഞു, അതില്‍ വലിയ വിഷമമുണ്ട്.
അയാളുടെ ഗസ്റ്റ് ഹൗസിന്റെ കാര്യം പറഞ്ഞു പലരും വിളിക്കുന്നുണ്ട്, അവര്‍ക്ക് ഗസ്റ്റ് ഹൗസില്‍ നടന്ന പല കാര്യങ്ങളും അറിയാം എന്നൊക്കെ പറഞ്ഞുകൊണ്ട് ഈ ഫോണ്‍ നമ്പറില്‍ വിളിക്കൂ എന്ന് പറയുന്നുണ്ട്. എനിക്ക് ഒരു നമ്പറിലും വിളിക്കേണ്ട കാര്യമില്ല, എനിക്ക് പറയാനുള്ളത് പറഞ്ഞു, മറ്റുള്ളവര്‍ എന്നെ പോലെ ഇതില്‍ പെടരുത് എന്ന് അറിയിക്കാനാണ് ഞാന്‍ ഇതൊക്കെ വിളിച്ചു പറയുന്നത്. ചില ആള്‍ക്കാര്‍ പറയുന്നത് കണ്ടു, ഞങ്ങള്‍ 14 വര്‍ഷം അനുഭവിച്ചതാണ് ഇവര്‍ രണ്ട് വര്‍ഷമേ അനുഭവിച്ചുള്ളൂ എന്ന്. രണ്ട് വര്‍ഷം അനുഭവിച്ചവര്‍ക്ക് ഇത്രയും സപ്പോര്‍ട്ട് കിട്ടുന്നുണ്ട്, 14 വര്‍ഷം അനുഭവിച്ചപ്പോള്‍ ആരും സപ്പോര്‍ട്ട് ചെയ്തില്ല എന്നൊക്കെ പറയുന്നുണ്ട്. എന്നെ ആരും സപ്പോര്‍ട്ട് ചെയ്യണം എന്ന് ഞാന്‍ ഞാന്‍ പറയുന്നില്ല. ഞാന്‍ അനുഭവിച്ചത് ഇനി വേറെ ആരും അനുഭവിക്കരുത്.
ഞാന്‍ എന്റെ കാര്യം നോക്കി മുന്നോട്ട് പോകുന്നുണ്ട്. എനിക്ക് ഡിപ്രഷന്‍ ഉണ്ട് അതിന് മരുന്ന് കഴിക്കുന്നുണ്ട്, ചെറിയ വിഷമങ്ങള്‍ ഒക്കെ ഉണ്ട് അല്ലാതെ വേറെ പ്രശ്‌നം ഒന്നും ഇല്ല. എന്നെ അല്ല അയാളെ ആണ് നിങ്ങള്‍ വിശ്വസിക്കുന്നതെങ്കില്‍ അയാളുടെ കുഴിയില്‍ പോയി ചാടിക്കോ. ഞാന്‍ ഒരു എംഡിക്ക് പഠിക്കുന്ന വിദ്യാര്‍ഥി ആണ് എനിക്ക് രാഷ്ട്രീയക്കാരുമായി ഒന്നും ബന്ധമില്ല. എന്റെ കുടുംബത്തെ നാണം കെടുത്തുന്ന പരിപാടികള്‍ നടക്കുന്നുണ്ട്, എന്റെ ജീവന് ഭീഷണി ഉണ്ട്, എനിക്ക് മാത്രം അല്ല എന്റെ കുടുംബാംഗങ്ങളുടെ ജീവനും ഭീഷണിയുണ്ട്. ഈ സപ്പോര്‍ട്ടിന്റെ കണക്കൊന്നും പറഞ്ഞ് എന്നെ ബുദ്ധിമുട്ടിക്കാന്‍ നോക്കണ്ട.
എന്നെ ആരും സപ്പോര്‍ട്ട് ചെയ്തില്ലെങ്കിലും സോഷ്യല്‍ മീഡിയ ഉള്ള കാലത്തോളം എന്നെ പൊലീസ് പിടിച്ചുകൊണ്ട് പോകുന്നത് വരെയും ഞാന്‍ പറഞ്ഞു കൊണ്ടിരിക്കും. ഇത്രനാളും ഒന്നും തുറന്നു പറയാതെ ഇരുന്നിട്ട് ഇപ്പോള്‍ സപ്പോര്‍ട്ടിന്റെ കാര്യം പറഞ്ഞു താരതമ്യം നടത്താന്‍ വരികയാണ്. ഒരു ഇര ന്യായമായത് വിളിച്ചു പറയുന്നു എന്ന് കാണുമ്പോള്‍ വേറൊരു ഇരയ്ക്ക് സന്തോഷം ആണ് തോന്നേണ്ടത്. എനിക്ക് മെസേജ് ചെയ്ത പല ഇരകളും ഉണ്ട്, വര്‍ഷങ്ങളായി ഒന്നും പറയാന്‍ കഴിയുന്നില്ല നിങ്ങള്‍ ഫൈറ്റ് ചെയ്യുന്നത് കാണുമ്പോള്‍ സന്തോഷം ഉണ്ട് എന്ന് പറഞ്ഞിട്ട്. നിങ്ങള്‍ ഇതില്‍ ജയിക്കണം അതാണ് ഞങ്ങളുടെ ആഗ്രഹം, നിങ്ങള്‍ ഞങ്ങള്‍ക്ക് പ്രചോദനം ആണ് എന്നൊക്കെ പറയുന്നത് കാണുമ്പൊള്‍ സന്തോഷം ഉണ്ട് അല്ലാതെ ജീവന് കളഞ്ഞിട്ട് എനിക്ക് ഒന്നും നേടാനില്ല.
Read more
