“തീവണ്ടി” എന്ന ചിത്രത്തിന് ശേഷം ടൊവീനോ തോമസും സംയുക്ത മേനോനും വീണ്ടും നായികാ-നായകന്‍മാരായി എത്തുന്ന പുതിയ ചിത്രമാണ് “എടക്കാട് ബറ്റാലിയന്‍ 06”. ടൊവിനോ ആദ്യമായി പട്ടാള വേഷത്തില്‍ എത്തുന്നു എന്ന പ്രത്യേകതയും ചിത്രത്തിനുണ്ട്. കാപ്റ്റന്‍ ഷഫീക് മുഹമ്മദ് എന്ന കഥാപാത്രമായാണ് ടൊവിനോ എത്തുന്നത്.
എടക്കാട് ബറ്റാലിയന്റെ മൂന്ന് ടീസറുകളാണ് ഇതുവരെ പുറത്ത് വിട്ടിരിക്കുന്നത്. തികച്ചും വ്യത്യസ്തമാണ് മൂന്ന് ടീസറുകളും. ആക്ഷന്‍ രംഗങ്ങളും സാഹിക രംഗങ്ങളുമായിരുന്നു ആദ്യ ടീസറില്‍. നാടും നാട്ടുകാരുമാണ് രണ്ടാമത്തെ ടീസറില്‍ പ്രത്യക്ഷപ്പെടുന്നത്. പ്രണയം നിറഞ്ഞ റൊമാന്റിക് ടീസറാണ് മൂന്നാമതായി എത്തിയത്. ഇതോടെ ആരാധകര്‍ ഏറെ പ്രതീക്ഷയിലാണ്. മൂന്ന് ടീസറുകളും ഒപ്പം എത്തിയ ഗാനങ്ങളും ആരാധകര്‍ ഏറ്റെടുത്തിരുന്നു.
നവാഗതനായ സ്വപ്നേഷ് നായര്‍ സംവിധാനം ചെയ്യുന്ന ചിത്രത്തിന് പി ബാലചന്ദ്രന്‍ ആണ് തിരക്കഥ ഒരുക്കുന്നത്. ദിവ്യാ പിളെള, പി ബാലചന്ദ്രന്‍, രേഖ, സന്തോഷ് കീഴാറ്റുര്‍, നിര്‍മ്മല്‍ പാലാഴി, ശങ്കര്‍ ഇന്ദു ചൂഡന്‍, ശാലു റഹിം തുടങ്ങിയവരാണ് മറ്റു പ്രധാന വേഷങ്ങളില്‍ എത്തുന്നത്. കാര്‍ണിവല്‍ മോഷന്‍ പിക്ചേഴ്സും റൂബി ഫിലിംസും ചേര്‍ന്നാണ് നിര്‍മാണം. കൈലാസ് മേനോന്‍ സംഗീതവും സിനു സിദ്ധാര്‍ത്ഥ് ക്യാമറയും നിര്‍വഹിക്കുന്നു.
