മമ്മൂട്ടിയെ നായകനാക്കി രാഹുൽ സദാശിവൻ സംവിധാനം ചെയ്യുന്ന ഏറ്റവും പുതിയ ചിത്രമാണ് ഭ്രമയുഗം. ഹൊറർ- മിസ്റ്ററി ഴോണറിൽ പുറത്തിറങ്ങുന്ന ചിത്രത്തിന്റെ ഓരോ പോസ്റ്ററുകളും വലിയ പ്രതീക്ഷകളാണ് നൽകുന്നത്.
ഇപ്പോഴിതാ ചിത്രത്തിലെ പുതിയ രണ്ട് പോസ്റ്ററുകൾ പുറത്തുവിട്ടിരിക്കുകയാണ് അണിയറപ്രവർത്തകർ. ചോരയൊലിപ്പിച്ച ശരീരവുമായി ഇരുട്ടിൽ ചൂട്ട് കത്തിച്ച് ആരെയോ തിരയുന്ന സിദ്ധാർത്ഥ് ഭരതന്റെ പോസ്റ്ററാണ് ഇപ്പോൾ പുറത്തുവിട്ടിരിക്കുന്നത്. അർജുൻ അശോകന്റെ പോസ്റ്റർ കഴിഞ്ഞ ദിവസം പുറത്തുവിട്ടിരുന്നു.
ചിത്രത്തിൽ പ്രധാന കഥാപാത്രമായാണ് അർജുൻ അശോകൻ എത്തുന്നത്. ചിത്രം ബ്ലാക്ക് ആന്റ് വൈറ്റിലാണ് പുറത്തിറങ്ങുന്നത് എന്നതും പ്രതീക്ഷ നൽകുന്നു. ഈ വർഷം ഏപ്രിലിൽ ആയിരിക്കും ചിത്രത്തിന്റെ വേൾഡ് വൈഡ് റിലീസ്. ഏസ്തെറ്റിക് കുഞ്ഞമ്മയാണ് ചിത്രത്തിന്റെ പോസ്റ്ററുകൾ ഡിസൈൻ ചെയ്തിരിക്കുന്നത്.
‘ഭൂതകാലം’ എന്ന ഹൊറർ ചിത്രത്തിലൂടെ മലയാള സിനിമയിൽ തന്റെ സ്ഥാനമുറപ്പിച്ച യുവ സംവിധായകനാണ് രാഹുൽ സദാശിവൻ. ‘റെഡ് റൈൻ’ എന്ന രാഹുലിന്റെ ആദ്യ സിനിമയും നിരൂപക പ്രശംസകൾ നേടിയിരുന്നു. മലയാളം അത് വരെ കണ്ടു ശീലിച്ച പരമ്പരാഗത ഹൊറർ സിനിമകളിൽ നിന്നും വ്യത്യസത്യമായിരുന്നു ഷെയ്ൻ നിഗവും രേവതിയും മുഖ്യ കഥാപാത്രങ്ങളായെത്തിയ ഭൂതകാലം.
ഭൂതകാലം പോലെ തന്നെ ‘ഭ്രമയുഗവും’ ഹൊറർ- മിസ്റ്ററി ഴോണറിലാണ് പുറത്തിറങ്ങുന്നത്. മമ്മൂട്ടിയെ കൂടാതെ അർജുൻ അശോകനും, സിദ്ധാർത് ഭരതനും ചിത്രത്തിൽ മുഖ്യ വേഷത്തിലെത്തുന്നുണ്ട്. അഞ്ചു ഭാഷകളിലായി വമ്പൻ പ്രോജക്ട് ആയാണ് ചിത്രമൊരുങ്ങുന്നത്.
Read more
വൈ നോട്ട് സ്റ്റുഡിയോസിന്റെയും നൈറ്റ് ഷിഫ്റ്റിന്റെയും ബാനറിൽ രാമചന്ദ്ര ചക്രവർത്തിയും ശശി കാന്തും നിർമ്മിക്കുന്ന ചിത്രത്തിൽ പ്രശസ്ത മലയാള സാഹിത്യകാരൻ ടി. ഡി രാമകൃഷണനാണ് സംഭാഷണങ്ങൾ എഴുതുന്നത്. രാഹുൽ സദാശിവൻ തന്നെയാണ് ചിത്രത്തിന്റെ തിരക്കഥ. ഷെഹ്നാദ് ലാലാണ് ചിത്രത്തിന് വേണ്ടി ഛായാഗ്രഹണം നിർവഹിച്ചിരിക്കുന്നത്, സംഗീതം ക്രിസ്റ്റോ സേവിയർ.