വടംവലി പ്രമേയമാകുന്ന ഇന്ദ്രജിത്തിന്റെ 'ആഹാ'; അര്‍ജുന്‍ അശോകന്‍ ആലപിച്ച ഗാനം പുറത്ത്

41ാം ജന്മദിനം ആഘോഷിക്കുകയാണ് നടന്‍ ഇന്ദ്രജിത്ത്. പിറന്നാള്‍ ദിനത്തില്‍ താരത്തിന്റെ പുതിയ ചിത്രം “ആഹാ”യിലെ നടന്‍ അര്‍ജുന്‍ അശോകന്‍ ആലപിച്ച ഗാനമാണ് പുറത്തുവിട്ടിരിക്കുന്നത്. ജുബിത് നമ്രടത്ത് എഴുതിയ ഗാനത്തിന് സംഗീത സംവിധാനം സയനോരയാണ്.

വടംവലി പ്രമേയമാകുന്ന ആഹാ ബിബിന്‍ പോള്‍ സാമുവല്‍ ആണ് സംവിധാനം ചെയ്യുന്നത്. നാസ പ്രൊഡക്ഷന്‍സിന്റെ ബാനറില്‍ പ്രേം എബ്രഹാം ആണ് നിര്‍മ്മാണം. മനോജ് കെ ജയന്‍, ശാന്തി ബാലചന്ദ്രന്‍, അമിത് ചക്കാലക്കല്‍, അശ്വിന്‍ കുമാര്‍, സിദ്ധാര്‍ത്ഥ ശിവ എന്നിങ്ങനെ നിരവധി അഭിനേതാക്കള്‍ ചിത്രത്തില്‍ അണിനിരക്കുന്നു.

2008-ലെ വടംവലി സീസണില്‍ എഴുപത്തിമൂന്ന് മത്സരങ്ങളില്‍ എഴുപത്തിരണ്ടിലും ചാമ്പ്യന്‍പട്ടം കരസ്ഥമാക്കിയ “ആഹാ നീലൂര്‍” എന്ന ടീമിനോടുള്ള ബഹുമാനസൂചകമായാണ് ചിത്രത്തിന് ആഹാ എന്ന പേര് നല്‍കിയിരിക്കുന്നത്. ചിത്രത്തിന്റെ ഛായാഗ്രാഹകന്‍ ബോളിവുഡില്‍ സജീവമായ രാഹുല്‍ ബാലചന്ദ്രനാണ്. ടോബിത് ചിറയത് തിരക്കഥയും സംഭാഷണവും ഒരുക്കുന്നു.

സയനോര ഫിലിപ്പ് ആണ് സംഗീതമൊരുക്കുന്നത്. സയനോര ഫിലിപ്പ് സംഗീത സംവിധാനം നിര്‍വഹിക്കുന്ന മൂന്നാമത്തെ ചിത്രമാണ് ആഹാ. വ്യത്യസ്ത സ്വഭാവത്തില്‍ പെടുന്ന നാല് ഗാനങ്ങളാണ് ആഹായ്ക്ക് വേണ്ടി സയനോര ഒരുക്കിയിരിക്കുന്നത്.