താന്‍ അഭിനയിച്ച പുതിയ ചിത്രമായ ആദ്യരാത്രിയെ പരിഹസിച്ച് കമന്റിട്ട വ്യക്തിക്ക് മറുപടി നല്‍കി നടന്‍ അജു വര്‍ഗീസ്. ആദ്യരാത്രിയിലെ ഗാനം ശ്രദ്ധേയമാകുന്നതുമായി ബന്ധപ്പെട്ട് അജു ഫെയ്‌സ്ബുക്കില്‍ പങ്കുവെച്ച ട്രോളിന് താഴെയാണ് ഒരാളുടെ പരിഹാസ കമന്റ്.
ആദ്യമായാണ് ഞാന്‍ അഭിനയിച്ച മുഴുനീളന്‍ ഗാനം നിമിഷ നേരം കൊണ്ട് ഹിറ്റാവുന്നത് എന്നതായിരുന്നു അജു പങ്കുവെച്ച ട്രോള്‍. ഇതിനു ഒരാളുടെ കമന്റ് ഇങ്ങനെ “സിനിമ കണ്ടവര്‍ അങ്ങനെ തന്നെയാ പറയുന്നത് നിമിഷ നേരം കൊണ്ട് കീശയിലെ കാശ് പോയെന്ന്”. ചിത്രത്തിന്റെ റിലീസ് തിയതി പോലും പ്രഖ്യാപിച്ചിട്ടില്ല എന്നതാണ് രസകരമായ കാര്യം.
പിന്നാലെ അജുവിന്റെ മറുപടിയും വന്നു. “അപ്പൊ താങ്കള്‍ ഈ സിനിമ കണ്ടു കഴിഞ്ഞു. വൗ!”. അജുവിനെ പിന്തുണച്ച് നിരവധി ആരാധകരാണ് രംഗത്തു വന്നത്. വെള്ളിമൂങ്ങയ്ക്ക് ശേഷം ബിജു മേനോന്‍-ജിബു ജേക്കബ് കൂട്ടുകെട്ട് ഒരുമിക്കുന്ന ചിത്രമാണ് ആദ്യരാത്രി. വെള്ളിമൂങ്ങ ഏറെ ജനപ്രീതി നേടിയ ചിത്രമായിരുന്നതിനാല്‍ ആദ്യരാത്രിയിലും പ്രേക്ഷകരുടെ പ്രതീക്ഷകള്‍ ചെറുതല്ല. ആദ്യരാത്രിയുടേതായി പുറത്തിറങ്ങുന്ന ഓരോ കാര്യത്തിനും ലഭിച്ചു കൊണ്ടിരിക്കുന്ന പിന്തുണ ഇതിന് ഉദാഹരണമാണ്.
Read more
ക്വീന്‍ എന്ന ചിത്രത്തിലൂടെ ശ്രദ്ധേയരായ ഷാരീസ്, ജെബിന്‍ എന്നിവര്‍ ചേര്‍ന്നാണ് ആദ്യരാത്രിയുടെ കഥയും, തിരക്കഥയും, സംഭാഷണവും രചിച്ചിരിക്കുന്നത്. സെന്‍ട്രല്‍ പിക്ച്ചേഴ്സ് ആണ് ചിത്രം പ്രദര്‍ശനത്തിനെത്തിക്കുന്നത്. തണ്ണീര്‍മത്തന്‍ ദിനങ്ങളിലൂടെ ശ്രദ്ധേയയായ അനശ്വര രാജന്‍ പ്രധാനവേഷത്തില്‍ അഭിനയിക്കുന്നുണ്ട്. വിജയരാഘവന്‍, സര്‍ജനു, അശ്വിന്‍ , മനോജ് ഗിന്നസ്, ജയന്‍ ചേര്‍ത്തല, മാലാ പാര്‍വതി എന്നിവരും പ്രധാന താരങ്ങളാണ്. ബിജിബാല്‍ ആണ് സംഗീതം നിര്‍വ്വഹിക്കുന്നത്. ശ്രീജിത്ത് നായരാണ് ചിത്രത്തിന്റെ ചായാഗ്രഹണം.
