നയന്‍താരയുമായി കൊമ്പുകോര്‍ത്ത് അജ്മല്‍; നടന്റെ ശക്തമായ തിരിച്ചുവരവ്

ഒരിടവേളയ്ക്ക് ശേഷം വീണ്ടുമൊരു ശക്തമായ കഥാപാത്രവുമായി ‘നെട്രികണ്ണി’ലൂടെ സിനിമയിലേക്ക് തിരിച്ചെത്തുകയാണ് നടന്‍ അജ്മല്‍ അമീര്‍. മലയാളം, തമിഴ്, തെലുങ്ക് ഭാഷകളില്‍ അജ്മല്‍ അഭിനയിച്ച ചിത്രങ്ങളും കഥാപാത്രങ്ങളും ശ്രദ്ധേയങ്ങളായിരുന്നു. ഇതിനിടെ നടന് സിനിമയില്‍ നിന്നും താരം ഇടവേള എടുത്തു.

പോസ്റ്റ് ഗ്രാജ്വേഷന്‍ പൂര്‍ത്തിയാക്കി രണ്ടു വര്‍ഷത്തെ ഇടവേളയ്ക്ക് ശേഷം അജ്മല്‍ അഭിനയിക്കുന്ന ചിത്രമാണ് നെട്രിക്കണ്‍. നയന്‍താര നായികയാവുന്ന ചിത്രത്തില്‍ വില്ലന്‍ വേഷത്തിലാണ് അജ്മല്‍ എത്തുന്നത്. ഇരുവരുടെയും കഥാപാത്രങ്ങളെ ചുറ്റിപ്പറ്റിയുള്ള സൈക്കോ ത്രില്ലറാണ് ചിത്രം.

കഴിഞ്ഞ ദിവസങ്ങളില്‍ പുറത്തിറങ്ങിയ ചിത്രത്തിന്റെ ട്രെയിലറിന് വലിയ സ്വീകരണമാണ് പ്രേക്ഷകരില്‍ നിന്നും ലഭിച്ചത്. നയന്‍താരയും അജ്മലും ഇഞ്ചോടിഞ്ച് പോരാട്ടമാണ് കാഴ്ച വെയ്ക്കുന്നത് എന്ന് ട്രെയ്‌ലര്‍ വ്യക്തമാക്കുന്നു. നെട്രിക്കണ്‍ തന്റെ അഭിനയ ജീവിതത്തിലെ വലിയൊരു വഴിത്തിരിവാകുമെന്നും തനിക്ക് ശക്തമായൊരു തിരിച്ചുവരവിന് കളമൊരുക്കുമെന്ന ആത്മ വിശ്വാസവുമാണ് അജ്മലിന്.

രാംഗോപാല്‍ വര്‍മ, മിഷ്‌കിന്‍ എന്നീ പ്രഗല്‍ഭ സംവിധായകരുടെ സിനിമകള്‍ ഉള്‍പ്പെടെ ഏതാനും ചിത്രങ്ങളിലാണ് അജ്മല്‍ തുടര്‍ന്ന് അഭിനയിക്കാനിരിക്കുന്നത്. നെട്രിക്കണ്‍ ഓഗസ്റ്റ് 13ന് വെള്ളിയാഴ്ച ഒ.ടി.ടി പ്ലാറ്റ്‌ഫോമിലൂടെ റിലീസ് ചെയ്യും.