നവാഗതനായ ബിബിൻ കൃഷ്ണയുടെ സംവിധാനത്തിൽ അനൂപ് നായകനായി ഒരുങ്ങിയ കുറ്റാന്വേഷണ ത്രില്ലർ ചിത്രം ‘ട്വെൻ്റി വൺ ഗ്രാംസ്’ കേരളത്തിലെ മികച്ച വിജയത്തിന് ശേഷം നാളെ മുതൽ ജി സി സി കേന്ദ്രങ്ങളിലും റിലീസ് ചെയ്യുന്നു. യൂ എ ഇ, ഖത്തർ, ബഹ്റൈൻ, മസ്കറ്റ് തുടങ്ങി എല്ലാ പ്രമുഖ ജി സി സി കേന്ദ്രങ്ങളിലും ചിത്രത്തിൻ്റെ പ്രദർശനം അദ്യ ദിനം മുതൽ തന്നെ ഗൾഫിൽ ഉണ്ടാകും.
കേരളത്തിൽ ആദ്യം മിതമായ സ്ക്രീനുകളിൽ വളരെ ചെറിയ രീതിയിൽ മാത്രം ഹൈപ് നൽകി റിലീസ് ചെയ്ത ചിത്രമായിരുന്നു ‘ട്വെൻ്റി വൺ ഗ്രാംസ്’. ഏന്നാൽ ക്രമേണ ചിത്രത്തിൻ്റെ നിലവാരത്തെ കുറിച് പ്രശംസിച്ച് കൊണ്ട് ഒട്ടനവധി പ്രേക്ഷകരും നിരൂപകരും ഓൺലൈനിൽ വരുന്ന കാഴ്ചയാണ് കണ്ടത്. തുടർന്ന് തിയേറ്ററുകളിലും പ്രേക്ഷകർ ഉയർന്ന് വരുകയും ഹൗസ് ഫുൾ ആയി പ്രദർശനങ്ങൾ കളിക്കാനും തുടങ്ങിയതോടെ മൂന്നാം നാൾ മുതൽ തന്നെ പലയിടത്തും തിയേറ്ററുകളിൽ അധിക ഷോ കളിക്കുന്ന അവസ്ഥയിലേക്കും ചിത്രം എത്തി. സിനിമ ഇൻഡസ്ട്രിക്ക് അകത്ത് നിന്നുതന്നെ നിരവധി പ്രമുഖരാണ് ചിത്രത്തെ പ്രശംസിച്ച് കൊണ്ട് എത്തിയത്. ജിത്തു ജോസഫ്, മിഥുൻ മാനുവൽ തോമസ്, രഞ്ജിത്ത് ശങ്കർ, സ്വർഗചിത്ര അപ്പച്ചൻ തുടങ്ങിയ പ്രമുഖ വ്യക്തികൾ ഒക്കെ സിനിമയെ പ്രശംസിച്ച് കൊണ്ട് സമൂഹ മാധ്യമങ്ങളിൽ എത്തിയിരുന്നു.
ദി ഫ്രൻ്റ് റോ പ്രൊഡക്ഷൻസിൻ്റെ ബാനറിൽ റിനിഷ് നിർമിച്ച ഈ ത്രില്ലർ ചിത്രത്തിൽ അനൂപ് മേനോന് പുറമെ ലിയോണ ലിഷോയ്, അനു മോഹൻ, ചന്തുനാഥ്, ലെന, രഞ്ജിത്, രഞ്ജി പണിക്കർ, മറീന മൈക്കൾ, നന്ദു, പ്രശാന്ത് അലക്സാണ്ടർ എന്നിവർ അടങ്ങിയ ഒരു വല്യ താരനിര തന്നെ അഭിനയിച്ചിരിക്കുന്നു.
Read more
ദീപക് ദേവ് ഈണം ഒരുക്കിയ പാട്ടുകൾക്ക് വിനായക് ശശികുമാർ രചന നിർവ്വഹിച്ചിരിക്കുന്നു. ജിത്തു ദാമോദർ ഛായാഗ്രഹണവും അപ്പു എൻ ഭട്ടത്തിരി ചിത്രസംയോജനവും ഒരുക്കിയിരിക്കുന്നു. മാർക്കറ്റിംഗ്: എം ആർ പ്രൊഫഷണൽ.
