‘ആട് 3’ക്ക് തുടക്കം കുറിച്ച് ജയസൂര്യയും മിഥുന്‍ മാനുവല്‍ തോമസും. ഇന്ന് കൊച്ചിയില്‍ വച്ചാണ് സിനിമയുടെ പൂജ ചടങ്ങുകള്‍ നടന്നത്. മിഥുന്‍ മാനുവലിനും ജയസൂര്യക്കുമൊപ്പം ഉണ്ണി മുകുന്ദന്‍, ഷറഫുദ്ദീന്‍, സൈജു കുറുപ്പ് എന്നിവരും ചടങ്ങില്‍ സന്നിഹിതരായിരുന്നു. ചിത്രത്തിന്റെ ഷൂട്ടിങ് ഈ മാസം 15 മുതല്‍ ആരംഭിക്കുമെന്നും ക്രിസ്മസ് റിലീസായി സിനിമ തിയേറ്ററുകളിലെത്തുമെന്നും മിഥുന്‍ അറിയിച്ചു.
ചിത്രം ഒരു സോംബി പടമാണോ എന്ന സംശയങ്ങള്‍ക്കും സംവിധായകന്‍ വിശദീകരണം നല്‍കി. ആട് 3 സോംബി ചിത്രമായിരിക്കില്ല, എന്നാല്‍ വ്യത്യസ്ത ഴോണറില്‍ കഥ പറയുന്ന സിനിമയാകും എന്നാണ് മിഥുന്‍ പറയുന്നത്. ”ആളുകള്‍ സമൂഹ മാധ്യമങ്ങളില്‍ ഉന്നയിക്കുന്ന ചോദ്യമാണ് ആട് 3 ഒരു സോംബി ചിത്രമാണോ എന്നത്. ആദ്യം പറയട്ടെ ഒരു സോംബി പടമല്ല ആട് 3.”
”ആടിന്റെ ഫ്‌ലേവറുകള്‍ മാറ്റാതെ ഈ സിനിമയെ കുറച്ചു കൂടി വലിയ ക്യാന്‍വാസിലേക്ക് മാറ്റുകയാണ് നമ്മള്‍. ഈ സിനിമ എപിക്-ഫാന്റസിയിലേക്ക് പോവുകയാണ്. എപിക്-ഫാന്റസി എന്ന് പറയുമ്പോള്‍ രാജാവും കുതിരകളുമൊക്കെയാണ് എന്റെ മനസില്‍ വരുന്നത്. അത്തരത്തില്‍ ഒരു സിനിമയായിരിക്കും ആട് 3.”
”എന്റെ കരിയറിലെ, ഫ്രൈഡേ ഫിലിം ഹൗസിന്റെ കരിയറിലെ ഏറ്റവും വലിയ സിനിമയാണ് ഇത്. ഈ ക്രിസ്മസിന് ഷാജി പാപ്പനും സംഘവും എത്തുമെന്ന് കരുതുന്നു. ഇ സിനിമയുടെ സിജി വര്‍ക്കുകള്‍ തീരുമെന്ന് കരുതിയാണ് ഞാന്‍ റിലീസിനെ കുറിച്ച് പറയുന്നത്. ഇനി അത് മാറിയാല്‍ ഒന്നും വിചാരിക്കരുത്. അത്രത്തോളം സിജി ഒക്കെ വരുന്ന സിനിമയാണ്” എന്നാണ് മിഥുന്റെ വാക്കുകള്‍.
Read more
അതേസമയം, 2013ല്‍ ജയസൂര്യയെ നായകനാക്കി മിഥുന്‍ ഒരുക്കിയ ആട് ഒരു ഭീകര ജീവിയാണ് എന്ന സിനിമയിലൂടെയാണ് ആട് ഫ്രാഞ്ചൈസി ആരംഭിച്ചത്. തിയേറ്ററില്‍ വിജയമാകാതെ പോയ സിനിമ ടെലലിവിഷനില്‍ പ്രീമിയര്‍ ചെയ്തതോടെയാണ് ഹിറ്റ് ആയി മാറിയത്. 2017ല്‍ ആണ് ചിത്രത്തിന്റെ രണ്ടാം ഭാഗം എത്തിയത്.
