നടി നസ്രിയയുടെ അഭിനയം ഭയങ്കര ഓവര്‍ ആയി തോന്നിയിട്ടുണ്ടെന്ന് സംവിധായകന്‍ ജൂഡ് ആന്തണി. സംവിധായകന്റെ ആദ്യ സിനിമയായ ‘ഓ ശാന്തി ഓ’മില്‍ നസ്രിയ ആയിരുന്നു നായിക. നസ്രിയയുടെ ഒരു സിനിമ കണ്ടപ്പോള്‍ അഭിനയം ഭയങ്കര ഓവര്‍ ആണെന്നും അതിനാല്‍ നടിയെ നായികയാക്കണ്ട എന്ന് തോന്നിയിരുന്നതായി ജൂഡ് ആന്തണി പറഞ്ഞിരുന്നു.
”നിവിന്‍ പോളി-നസ്രിയ കോബോ ആദ്യം കൊണ്ടുവന്നത് അല്‍ഫോന്‍സ് പുത്രനാണ്. ഞാന്‍ ഓം ശാന്തി ഓശാന ചെയ്യുന്ന സമയത്ത് എല്ലാവരും ആദ്യമേ നസ്രിയ ചെയ്താല്‍ നന്നായിരിക്കുമെന്ന് പറഞ്ഞു. ആ സമയത്ത് അവരുടെ മാഡ് ഡാഡ് എന്ന സിനിമ ഇറങ്ങിയിരുന്നു. ഭയങ്കര ഓവറാണല്ലോ ദൈവമേ എന്ന് തോന്നി.”
”കാസ്റ്റ് ചെയ്യാന്‍ പേടിയായി. വേറെ ആളെ നോക്കാമെന്ന് കരുതി. അങ്ങനെ ഒരുപാട് പേരെ നോക്കി. എന്തോ ഭാഗ്യത്തിന് എനിക്കാരെയും കറക്ട് ആയി കിട്ടിയില്ല. പിന്നീട് നസ്രിയ തന്നെ നായികയായി എത്തി. എഡിറ്റിംഗ് ടേബിളില്‍ കണ്ടപ്പോഴാണ് എത്രമാത്രം നന്നായാണ് അവര്‍ ചെയ്തതെന്ന് മനസിലായത്.”
”നസ്രിയ അല്ലാതെ വേറെ ആര്‍ക്കും ആ റോള്‍ ചെയ്യാന്‍ പറ്റുമെന്ന് തോന്നുന്നില്ല. എന്നോട് ഇതേ കുറിച്ച് ഒരാള്‍ ഡീറ്റെയ്ല്‍ ആയി പറഞ്ഞപ്പോള്‍ വേറെ ആരാണിത് ചെയ്യുകയെന്ന് ഞാന്‍ ആലോചിച്ചു. വെറുതെ ഒരു നന്ദി അവള്‍ക്കയച്ചു. എന്താണ് ഏട്ടായെന്ന് ചോദിച്ചപ്പോള്‍ ഒന്നുമില്ല, ഇരിക്കട്ടെയെന്ന് ഞാന്‍. ഇന്നും ഓര്‍ക്കുന്ന കാലമാണത്.”
Read more
”എനിക്ക് ഒരു പണിയും ഇല്ലായിരുന്നു. ക്യാമറ ഓണ്‍ ചെയ്യുന്നു, അവര്‍ അഭിനയിക്കുന്നു. ബാക്കി കാര്യങ്ങള്‍ നോക്കിയാല്‍ മതിയായിരുന്നു. ഇടയ്ക്ക് എപ്പോഴെങ്കിലും കുറച്ച് കൂടി നന്നായിരുന്നെങ്കില്‍ കൊള്ളാമായിരുന്നു എന്നേ പറയേണ്ടി വന്നിട്ടുളളൂ. നസ്രിയ അല്ലാതെ ഒരു ഓപ്ഷനില്ല” എന്നാണ് ജൂഡ് ആന്തണി മിര്‍ച്ചി മലയാളത്തോട് പ്രതികരിച്ചത്.
