ആദ്യ ഭാര്യ റീന ദത്തയുമായുള്ള വിവാഹബന്ധത്തിൽ നിന്ന് താൻ ഒരുപാട് കാര്യങ്ങൾ പഠിച്ചതായി ബോളിവുഡ് നടൻ ആമിർ ഖാൻ. ആദ്യ ഭാര്യ റീന ദത്തയുമായുള്ള തന്റെ വിവാഹം എടുത്തുചാട്ടമായിരുന്നു എന്നും രാജ് ശമാനിക്ക് നൽകിയ അഭിമുഖത്തിൽ നടൻ പറഞ്ഞു. ജീവിതത്തിൽ എടുത്ത ഖേദിക്കുന്ന ഒരു തീരുമാനത്തെക്കുറിച്ച് ചോദിച്ചപ്പോഴായിരുന്നു താരത്തിന്റെ മറുപടി.

‘ഒന്നല്ല, ഒരുപാട് തെറ്റുകൾ ഞാൻ ചെയ്തിട്ടുണ്ട്. റീനയുമായുള്ള വിവാഹം വളരേ നേരത്തേയായിരുന്നു. എനിക്ക് 21-ഉം അവൾക്ക് 19-ഉം ആയിരുന്നു. എനിക്ക് നിയമപരമായി വിവാഹം ചെയ്യാൻ കഴിയുന്ന ആദ്യത്തെ ദിവസം തന്നെ ഞങ്ങളുടെ വിവാഹം നടത്തി- ഏപ്രിൽ 18ന്’

‘ഞങ്ങൾ തമ്മിൽ നാലുമാസത്തെ പരിചയം മാത്രമേ ഉണ്ടായിരുന്നുള്ളൂ. ഒന്നിച്ച് അധികം സമയംപോലും ചെലവഴിച്ചിരുന്നില്ല. ഞങ്ങൾ പരസ്പരം ഒരുപാട് സ്‌നേഹിച്ചു. എന്നാൽ, ഇന്ന് തിരിഞ്ഞുനോക്കുമ്പോൾ, ഞങ്ങൾ അതിനെക്കുറിച്ച് ആലോചിക്കേണ്ടിരുന്നുവെന്ന് തോന്നി. ചെറുപ്പവും അശ്രദ്ധയും കാരണം ഞങ്ങൾക്ക് പലകാര്യങ്ങളും തിരിച്ചറിയാൻ സാധിച്ചില്ല’.

എന്നാൽ ബന്ധത്തെക്കുറിച്ച് തനിക്ക് കുറ്റബോധമൊന്നുമില്ല എന്നും ആമിർ ഖാൻ കൂട്ടിച്ചേർത്തു. ‘റീനയ്‌ക്കൊപ്പം നല്ല ജീവിതമായിരുന്നു. എന്റെ വാക്കുകൾ തെറ്റിദ്ധരിക്കരുത്. റീനയല്ല, വിവാഹം ചെയ്ത സമയമായിരുന്നു പ്രശ്‌നം. റീന മികച്ചൊരു വ്യക്തിയാണ്. ഞങ്ങൾ പരസ്പരം ബഹുമാനിച്ചു, ഒരുപാട് സ്‌നേഹിച്ചു. എന്നാൽ, ഇത്രയും ചെറിയ പ്രായത്തിൽ പരിഭ്രാന്തിയിൽ ഇത്രയും വലിയൊരു തീരുമാനം എടുക്കാൻ പാടില്ലെന്നാണ് എനിക്ക് തോന്നുന്നത്’ എന്നുമാണ് ആമിർ അഭിപ്രായപ്പെട്ടു.