തനിക്ക് കുഞ്ഞുണ്ടായ ശേഷം ആദ്യമായി അഭിനയിക്കുന്ന ചിത്രമാണ് ‘തങ്കമണി’ എന്ന് നടി പ്രണിത സുഭാഷ്. ദിലീപ് നായകനായി എത്തിയ ചിത്രത്തില്‍ അര്‍പിത നാഥ് എന്ന ഐപിഎസ് ഉദ്യോഗസ്ഥ ആയാണ് പ്രണിത അഭിനയിച്ചത്. ഈ സിനിമ തനിക്ക് ഏറെ സ്‌പെഷ്യല്‍ ആണ് എന്നാണ് പ്രണിത പറയുന്നത്.
”എന്റെ ഒരു സിനിമയുടെ സെറ്റില്‍ ഭര്‍ത്താവ് എത്തുന്നത് ആദ്യമായിട്ടായിരുന്നു. മാത്രമല്ല, കുഞ്ഞിനെ പ്രസവിച്ചതിന് ശേഷം ഞാന്‍ ചെയ്ത ഏറ്റവും ആദ്യത്തെ സിനിമയാണ് തങ്കമണി. അതുകൊണ്ട് തന്നെ പല കാരണങ്ങളാലും ഈ സിനിമ എനിക്ക് സ്പെഷലാണ്. ദയവ് ചെയ്ത് ഞങ്ങള്‍ക്ക് കുറച്ച് സ്നേഹം തരണം” എന്നാണ് പ്രണിത കുറിച്ചിരിക്കുന്നത്.
ചിത്രത്തിലെ കഥാപാത്രത്തിന്റെ ലുക്കില്‍ എടുത്ത ഏതാനും ചിത്രങ്ങള്‍ക്കൊപ്പമാണ് നടിയുടെ കുറിപ്പ്. ഒരു ചിത്രത്തില്‍ ഭര്‍ത്താവ് നിഥിന്‍ രാജുവിനെ ചേര്‍ത്തു പിടിച്ചതും കാണാം. 2021ല്‍ ആയിരുന്നു ബിസിനസുകാരനായ നിഥിന്‍ രാജുവുമായുള്ള പ്രണിതയുടെ വിവാഹം.
വിവാഹത്തിന് ശേഷം രണ്ട് വര്‍ഷത്തോളമായി കരിയറില്‍ നിന്നും ബ്രേക്ക് എടുത്ത് നില്‍ക്കുകയായിരുന്നു നടി. 2022ല്‍ ഒരു മകള്‍ പിറന്നു. പ്രസവത്തിന് അടുത്തിടെയാണ് നടി സിനിമയില്‍ സജീവമാകാന്‍ തുടങ്ങിയത്. കന്നട ചിത്രം ‘രാമണ അവതാരം’ ആണ് പ്രണിതയുടെതായി ഒരുങ്ങുന്ന ഏറ്റവും പുതിയ ചിത്രം.
അതേസമയം, രതീഷ് രഘുനന്ദന്റെ സംവിധാനത്തില്‍ ഒരുങ്ങിയ തങ്കമണിക്ക് റിലീസ് ദിവസം മുതല്‍ തന്നെ നെഗറ്റീവ് അഭിപ്രായങ്ങളാണ് ലഭിച്ചു കൊണ്ടിരിക്കുന്നത്. 1986 ഒക്ടോബറില്‍ തങ്കമണിയില്‍ നടന്ന ഒരു യഥാര്‍ത്ഥ സംഭവത്തെ ആസ്പദമാക്കിയാണ് സിനിമ. നീത പിള്ളയാണ് ചിത്രത്തില്‍ നായികയായത്.