പ്രിയന്‍ ഒരല്‍പ്പം റിലാക്സ് ചെയ്യട്ടെ, അടുത്ത ചിത്രം ഉടനില്ല: മോഹന്‍ലാല്‍

വളരെ നാളത്തെ കാത്തിരിപ്പിന് ശേഷമാണ് മോഹന്‍ലാല്‍ പ്രിയദര്‍ശന്‍ കോംബിനേഷനിലെ ബ്രഹ്‌മാണ്ഡ ചിത്രം മരയ്ക്കാര്‍: അറബിക്കടലിന്റെ സിംഹം തിയേറ്ററുകളില്‍ എത്തിയത്. സമ്മിശ്ര പ്രതികരണങ്ങളായിരുന്നു ചിത്രത്തിന് ലഭിച്ചത്.

മാസ് ഡയലോഗുകളും ആക്ഷന്‍ രംഗങ്ങളുമൊക്കെ പ്രതീക്ഷിച്ച ഒരുവിഭാഗം പ്രേക്ഷകരെ നിരാശപ്പെടുത്തിയെന്ന പരാതികളും ഉയര്‍ന്നിരുന്നു. ഇനി അടുത്തൊരു പ്രിയദര്‍ശന്‍ ചിത്രം എന്നുണ്ടാകും എന്ന ചോദ്യത്തിന് മറുപടി പറയുകയാണ് മലയാളത്തിന്റെ സൂപ്പര്‍ സ്റ്റാര്‍ മോഹന്‍ലാല്‍.

താന്‍ കമ്മിറ്റ് ചെയ്ത ഒരുപാട് സിനിമകള്‍ ഇനിയും തീര്‍ക്കാനുണ്ട്. സ്വന്തം സംവിധാനത്തില്‍ ഒരുക്കുന്ന ബറോസ് ഇനിയും പൂര്‍ത്തിയാക്കാനുണ്ട്. മോഹന്‍ലാല്‍ ആദ്യമായി സംവിധായകനാകുന്ന ചിത്രം കൂടിയാണ് ബറോസ്. ജിജോ പുന്നൂസിന്റേതാണ് തിരക്കഥ. ജീത്തു ജോസഫ് സംവിധാനം ചെയ്യുന്ന ചിത്രമായ റാം ഇനിയും പൂര്‍ത്തിയാക്കാനുണ്ടെന്നും മോഹന്‍ലാല്‍ പറഞ്ഞു.

ചിത്രത്തിന്റെ പകുതി ഭാഗം കഴിഞ്ഞു. പകുതി യുകെയിലാണ് ചിത്രീകരിക്കുന്നത്. എഗ്രിമെന്റ് ചെയ്ത ഒന്നുരണ്ട് സിനിമകള്‍ ബാക്കിയുണ്ട്. ഇതിനൊക്കെ ശേഷമായിരിക്കും അടുത്തൊരു പ്രിയദര്‍ശന്‍ സിനിമയെന്ന് മോഹന്‍ലാല്‍ പറഞ്ഞു. പ്രിയനുമൊന്ന് റിലാക്‌സ് ചെയ്‌തോട്ടെയെന്ന് മോഹന്‍ലാല്‍ പ്രതികരിച്ചു.