ക്വീൻ, ജനഗണമന എന്നീ ചിത്രങ്ങളിലൂടെ മലയാള സിനിമപ്രേക്ഷകർക്ക് പരിചിതമായ പേരാണ് ഡിജോ ജോസ് ആന്റണി, അതുപോലെ തന്നെയാണ് ലിസ്റ്റിൻ സ്റ്റീഫൻ എന്ന നിർമ്മാതാവും. ലിസ്റ്റിൻ സ്റ്റീഫന്റെ പ്രൊഡക്ഷൻ കമ്പനിയായ മാജിക് ഫ്രെയിസിലൂടെ ഒരുപാട് മികച്ച ചിത്രങ്ങൾ പുറത്തിറങ്ങിയിട്ടുണ്ട്.
നിവിൻ പോളിയെ നായകനാക്കി ഡിജോ ജോസ് ആന്റണി സംവിധാനം ചെയ്യുന്ന ഏറ്റവും പുതിയ ചിത്രം നിർമ്മിക്കുന്നതും ലിസ്റ്റിൻ സ്റ്റീഫനാണ്. ഇപ്പോഴിതാ ചിത്രത്തെ കുറിച്ചും അതിന്റെ ബഡ്ജറ്റിനെ കുറിച്ചും സംസാരിക്കുകയാണ് ലിസ്റ്റിൻ സ്റ്റീഫൻ.
പേര് പ്രഖ്യാപിക്കാത്ത ഈ ചിത്രം തന്നെ സംബന്ധിച്ച് സാമ്പത്തിക വിജയം നേടിയേ തീരുവെന്നാണ് ലിസ്റ്റിൻ പറയുന്നത്. കൂടാതെ 60 ദിവസം പ്ലാൻ ചെയ്ത ഷൂട്ട് ഇപ്പോൾ 130 ദിവസം കഴിഞ്ഞെന്നും വിചാരിച്ചതിലും കൂടുതൽ ബഡ്ജറ്റ് സിനിമയ്ക്ക് ആയെന്നും ലിസ്റ്റിൻ സ്റ്റീഫൻ പറയുന്നു.
“നിവിനെ നായകനാക്കി ഡിജോ ചെയ്യുന്ന പടം 60 ദിവസത്തെ ഷൂട്ടേ ഉണ്ടാവൂ എന്നാണ് പറഞ്ഞത്. എന്നാൽ 130 ദിവസമാണ് ഷൂട്ട് പോയത്. വലിയൊരു ബഡ്‌ജറ്റിലേക്ക് പോയിരിക്കുകയാണ് ചിത്രം.
എന്നെ സംബന്ധിച്ച് ഞാൻ നിവിനെ വെച്ച് ചെയ്യേണ്ട സിനിമ ഇതാണ്. രാമചന്ദ്ര ബോസ് ആൻഡ് കമ്പനിയായിരുന്നില്ല. ബോസ് ആൻഡ് കോയ്ക്ക് കൈ കൊടുക്കേണ്ടി വന്നതാണ്.
നിവിനെ വെച്ച് ചെയ്യുന്ന പുതിയ ചിത്രത്തിന്റെ ബഡ്ജറ്റ് എവിടെയോ പോയി നിൽക്കുകയാണ്. ഇത് നേരത്തെയുള്ള ലിസ്റ്റിൻ ആണെങ്കിൽ നടക്കില്ല. ഞാനും ഡിജോയും തമ്മിൽ വലിയ വാഗ്വാദം ആകും. വിഷയം അസോസിയേഷനിൽ വരും. എനിക്ക് പകരം വേറെ ആരെങ്കിലും സിനിമ എടുക്കും. സിനിമയുടെ സീൻ കുറഞ്ഞെന്നിരിക്കും. അങ്ങനെയൊക്കെ സാഹചര്യം വരും
എന്നാൽ ഇന്ന് ഞാൻ ആ സിനിമയ്ക്കൊപ്പം നിൽക്കുകയാണ്. നല്ലത് സംഭവിക്കുമെന്ന വിശ്വാസമുണ്ടല്ലോ. നിവിനെ വെച്ചിട്ട് ആ സിനിമ ഹിറ്റാക്കുക എന്നത് എന്റെ ഏറ്റവും വലിയ ആവശ്യമാണ്. അങ്ങനെ വിശ്വസിച്ച് കുറേ കോംപ്രമൈസ് ചെയ്യുകയാണ്. ഏതറ്റം വരെയും പോകാമെന്ന് ചിന്തിക്കുകയാണ്.
ആ സിനിമയുടെ ബഡ്ജറ്റ് ഞാൻ പറഞ്ഞാൽ നിങ്ങൾ ചിലപ്പോൾ വിശ്വസിക്കില്ല. അത്രയും വലിയ ബഡ്‌ജറ്റിൽ എത്തി നിൽക്കുകയാണ്. സാധാരണ ഒരു സിനിമ 60-70 ദിവസത്തിൽ തീരും. ഇത് 130 ദിവസത്തോളം ഷൂട്ട് ഇപ്പോൾ തന്നെയായി.
ഒരു കൊച്ച് സിനിമ എന്ന് പറഞ്ഞ് തുടങ്ങിയതാണ് ഈ പടം അതാരു വലിയ സിനിമയിലേക്ക് പോയി. എല്ലാം ഉണ്ട്. വിഷ്വലി ആയാലും എല്ലാം. അത്രയും വലിപ്പം ആ സിനിമയ്ക്ക് ഫീൽ ചെയ്യും.
ഇവിടെ ഞാൻ ഡിജോയെ കുറ്റം പറയുകയോ എൻ്റെ പ്രൊഡക്‌ടിനെ നെഗറ്റീവ് ആയി പറഞ്ഞതോ അല്ല.
Read more
നേരത്തെ ഉള്ള ലിസ്റ്റിൻ ആയിരുന്നെങ്കിൽ ഒന്നുകിൽ ഞാൻ അല്ലെങ്കിൽ അവൻ എന്ന രീതിയിൽ കാര്യങ്ങൾ എത്തിച്ചേരും. കാരണം എനിക്ക് എനിക്ക് ചെയ്യാൻ പറ്റില്ലല്ലോ. ഇന്ന് ഇപ്പോൾ നമുക്ക് അത് കുഴപ്പമില്ലാത്തുകൊണ്ടാണ് ഈ രീതിയിൽ പോകുന്നത്” ദി ക്യുവിന് നൽകിയ അഭിമുഖത്തിലാണ് പുതിയ ചിത്രത്തെ കുറിച്ച് ലിസ്റ്റിൻ സ്റ്റീഫൻ മനസുതുറന്നത്
