രാജീവ് രവി ഒരു യഥാര്‍ത്ഥ സംഭവത്തെ ആസ്പദമാക്കി സംവിധാനം ചെയ്ത ചിത്രം കുറ്റവും ശിക്ഷയും തിയേറ്ററില്‍ പ്രദര്‍ശനം തുടരുകയാണ്. ഇപ്പോഴിതാ ചിത്രത്തെക്കുറിച്ച് കുറിപ്പ് പങ്കുവെച്ചിരിക്കുകയാണ് ബിനീഷ് കോടിയേരി. രാജ്യത്തെ ന്യൂനപക്ഷത്തിന് അവരുടെ ജീവിതം എത്രത്തോളം ഭയാനകമാകുന്നുണ്ട് എന്ന് ചിത്രം വരച്ചു കാട്ടുന്നു. അത് തന്നെയാണ് ചിലരെ അലോസരപ്പെടുത്തുന്നത് എന്ന് ബിനീഷ് പറയുന്നു.
ബിനീഷ് കോടിയേരിയുടെ വാക്കുകള്‍:
കാലത്തോട് നിരന്തരം കലഹിക്കുന്നവന്‍ ആണ് കലാകാരന്‍, കാലത്തോട് മാത്രമല്ല അനീതിയോടും. അതുകൊണ്ട് തന്നെ മനുഷ്യനെ മനുഷ്യനായി കാണുന്ന അങ്ങനെ ഉള്ള ഒരാള്‍ സിനിമ, എഴുത്ത്, വായന എന്നിങ്ങനെ സകലമേഖലകളും ഇടപെടുമ്പോള്‍ അത് രാഷ്ട്രീയ പ്രവര്‍ത്തനം ആയി മാറുകയാണ്, രാഷ്ട്രീയ പ്രവര്‍ത്തനം എന്നത് താന്‍ ഇടപെടുന്ന മേഖലയിലൂടെ വര്‍ത്തമാന കാലഘട്ടത്തിന്റെ സാമൂഹ്യ അവസ്ഥ എന്നത് എന്ത് എന്ന് പറഞ്ഞു പോകുന്നവനായിരിക്കും, അത് കൊണ്ട് തന്നെയാണ് വര്‍ഗീയ ഫാസിസത്തിന് എതിരെ രാഷ്ട്രീയ ബോധം ഉള്ള കലാകാരന്മാര്‍ നിരന്തരം കലാപം നടത്തുന്നതും. സഖാവ് രാജീവ് രവി ഒരു ചിത്രം പുറത്തിറക്കുമ്പോള്‍ അതില്‍ തീര്‍ച്ചയായും കാവി ഭീകരതയുടെ ആഴം നമ്മുടെ സമൂഹത്തില്‍ എത്രത്തോളം ആഴത്തില്‍ പതിഞ്ഞിരിക്കുന്നു എന്ന് പറയാതെ പോകില്ലല്ലോ.
ഉത്തരേന്ത്യയിലെ ന്യൂനപക്ഷക്കാരന്റെ ജീവിതം എത്രത്തോളം ഭയാനകമാണെന്ന് കുറ്റവും ശിക്ഷയും എന്ന സിനിമയിലെ ഒറ്റ സീനില്‍ രാജീവ് രവി വിവരിക്കുന്നുണ്ട്, അതാണ് സത്യവും . അത് കൊണ്ട് തന്നെ ആ ചിത്രം പലരെയും അലോസരപ്പെടുത്തും. അതുകൊണ്ട് തന്നെ വളരെ നിശ്ശബദ്ധമായെങ്കിലും ഇത്തരത്തിലുള്ള സിനിമകളെ ഇല്ലായ്മ ചെയ്യുവാനുള്ള തീവ്ര ശ്രമങ്ങളും നടക്കുന്നു. ഇന്നിന്റെ ഇന്ത്യ ഞങ്ങള്‍ പറയുന്നതുപേയാണ് അതിനപ്പുറത്തേക്കുള്ള ഒന്നും നിങ്ങള്‍ അറിയുവാനോ പറയുവാനോ പാടില്ല, ഞങ്ങള്‍ വരച്ചുകാട്ടുന്ന ഇന്ത്യയിലൂടെ നിങ്ങളൊക്കെ നടന്നാല്‍ മതി എന്ന തിട്ടൂരമാണ് ഇത്തരത്തിലെ സംഘടിത ശ്രമങ്ങളിലൂടെ നടത്തുന്നത്.
Read more
ന്യൂനപക്ഷത്തെ ചേര്‍ത്തു നിര്‍ത്തേണ്ടത് അല്ലെങ്കില്‍ അവരോടുള്ള നിലപാടുകള്‍ എടുക്കേണ്ടത് ന്യൂനപക്ഷ വര്‍ഗ്ഗീയത മുറുകെ പിടിക്കുന്ന വിഭാഗങ്ങളുടെ ജല്പനങ്ങള്‍ കേട്ടല്ല . നല്ല ദീനി ബോധമുള്ള മുസ്ലിമുകള്‍ ഒരു തരത്തിലും തങ്ങളോട് ചേര്‍ത്തു നിര്‍ത്താത്തവരാണ് ഈ പറഞ്ഞ ന്യൂനപക്ഷ വര്‍ഗ്ഗീയ വാദികള്‍. പക്ഷെ ഈ മണ്ണ് , കേരളം മതേതരത്വത്തിന്റെ മണ്ണാണ്, കാവിവല്‍ക്കരണത്തിനു ശ്രമിക്കുന്നവരെ ആര്‍ജവത്തോടെ പരാജയപ്പെടുത്തിയ മണ്ണാണ് . ഈ നാടിനു രാജീവ് രവിയെ പോലെ ഉള്ള കലാകാരന്മാരെയും അവരുടെ സൃഷ്ടികളെയും ചേര്‍ത്തു പിടിയ്ക്കാനും സംരക്ഷിയ്ക്കാനും കൃത്യമായി അറിയാം എന്ന് ആവര്‍ത്തിച്ചു നമ്മള്‍ ബോധ്യപ്പെടുത്തി കൊടുത്തു കൊണ്ടേ ഇരിക്കും. എപ്പോഴും നമ്മള്‍ സ്വയം പറയേണ്ടുന്ന ഒന്ന് നിശ്ശബ്ദരായിരിക്കാന്‍ നമുക്കെന്തവകാശം എന്നാണ്.
