വിക്രം പ്രധാന വേഷത്തിലെത്തുന്ന ചിത്രമാണ് കോബ്ര. ഓഗസ്റ്റ് 31ന് തിയേറ്ററുകളിൽ എത്തുന്ന ചിത്രത്തിൽ നായികയായെത്തുന്നത് മിയയാണ്. ചിത്രത്തിന്റ പ്രെമോഷന്റെ ഭാഗമായി കൊച്ചിയിൽ നടന്ന പരിപാടിക്കിടെ മാധ്യമങ്ങളുമായി നടത്തിയ കൂടിക്കാഴ്ചയിൽ മിയ തന്റെ ജീവിതത്തിലെ മാറ്റങ്ങൾ പറഞ്ഞപ്പോൾ വിക്രം അതിന് മറുപടിയായി പറഞ്ഞ വാക്കുകളാണ് ശ്രദ്ധ നേടുന്നത്.
ഫസ്റ്റ് ഷെഡ്യൂളിൽ താൻ അവരുടെ മോനായിരുന്നു എന്നാൽ സെക്കൻഡ് ഷെഡ്യൂളിൽ താൻ ക്ലാസ്മേറ്റായിരുന്നു. തേർഡ് ഷെഡ്യൂളിൽ ഭർത്താവും ഫോർത്ത് ഷെഡ്യൂളായപ്പോൾ അപ്പൂപ്പനുമായി മാറിയെന്നായിരുന്നു വിക്രം പറഞ്ഞത്. സിനിമയുടെ ഷൂട്ടിങ് നീളുന്നതിനിടെ തന്റെ ജീവിതത്തിലും വലിയ മാറ്റങ്ങളുണ്ടായി എന്നാണ് മിയ പറയുന്നത്. 2019 ൽ ആണ് സിനിമയുടെ ഷൂട്ടിങ് തുടങ്ങിയത്.
2020 ജനുവരിയിലാണ് ഞാൻ പടത്തിൽ ജോയിൻ ചെയ്യുന്നത്. അപ്പോൾ ഞാൻ സിംഗിളായിരുന്നു. രണ്ടാം ഷെഡ്യൂളിന് പോയപ്പോഴേക്കും ഞാൻ വിവാഹിതയായി. മൂന്നാമത്തെ ഷെഡ്യൂളിന് പോയപ്പോൾ അഞ്ചുമാസം ഗർഭിണിയായിരുന്നു, പടത്തിന്റെ അവസാന ഷെഡ്യൂൾ തീർത്ത സമയത്ത് മകൻ ലൂക്കയ്ക്ക് അഞ്ചുമാസമായിരുന്നു പ്രായം, ഇപ്പോൾ റിലീസ് സമയമാവുമ്പോഴേക്കും ഇതാ ആൾക്ക് ഒരു വയസ്സ് കഴിഞ്ഞിട്ടുണ്ട്.
Read more
ഇനി പടത്തിന്റെ സക്‌സസ് പാർട്ടി ആകുമ്പോഴേക്കും അവന് ഒന്നര വയസ് ആകുമായിരിക്കുമെന്നും മിയ കൂട്ടിച്ചേർത്തു. മിയ സംസാരിക്കുന്നതിനിടെ ലൂക്കയെയും എടുത്ത് വിക്രമും വേദിയിലെത്തി. ‘ഇത് കോബ്ര ബേബിയാണ്’ എന്നാണ് വിക്രം കുഞ്ഞിനെ വിശേഷിപ്പിച്ചത്. തുടർന്ന് മിയയുടെ ഭർത്താവ് അശ്വിനെയും വേദിയിലേക്ക് വിളിച്ച് മൂവരും കുഞ്ഞു ലൂക്കയും ചേർന്ന് ഫോട്ടോയും എടുത്താണ് വേദി വിട്ടത്
