അദിതി റാവു ഹൈദരിയുടെയും സിദ്ധാര്‍ഥിന്റെയും വിവാഹ വാര്‍ത്തയായിരുന്നു കഴിഞ്ഞ ദിവസം സൈബര്‍ ഇടത്തെ ഹോട്ട് ടോപിക്. 2021ല്‍ പ്രണയത്തിലായ ഇരുവരും ഏറെ കാലമായി ലിവിംഗ് ടുദര്‍ ബന്ധത്തിലായിരുന്നു. കഴിഞ്ഞ ദിവസമായിരുന്നു തെലങ്കാനയിലെ വാനപര്‍ത്തി ജില്ലയിലെ ശ്രീരംഗപൂരിലുള്ള ശ്രീ രംഗനായകസ്വാമി ക്ഷേത്രത്തില്‍ വച്ച് താരങ്ങള്‍ വിവാഹിതരായത്.
എന്നാല്‍ ഇരുവരുടെയും വിവാഹചിത്രങ്ങള്‍ ഒന്നും ഇതുവരെ പുറത്തുവന്നിട്ടില്ല. താരങ്ങള്‍ ഈ വാര്‍ത്തകളോട് പ്രതികരിക്കുകയും ചെയ്തിട്ടില്ല. ഇതോടെ ആരാധകര്‍ കണ്‍ഫ്യൂഷനില്‍ ആയിരുന്നു. അദിതിയും സിദ്ധാര്‍ഥും ശരിക്കും വിവാഹിതരായോ എന്ന സംശയത്തിലാണ് സോഷ്യല്‍ മീഡിയ.
എന്നാല്‍ ഈ സംശയത്തിന് അദിതിയുടെ പുതിയ വെബ് സീരിസ് ആയ ‘ഹീരാമണ്ഡി: ദ ഡയമണ്ട് ബസാറി’ന്റെ റിലീസ് പ്രഖ്യാപന ചടങ്ങില്‍ വച്ച് മറുപടി ലഭിച്ചിരിക്കുകയാണ്. സഞ്ജയ് ലീല ബന്‍സാലി ഒരുക്കുന്ന വെബ് സീരിസ് ആണ് ഹീരാമണ്ഡി. സീരിസിലെ മറ്റ് പ്രധാന അഭിനേതാക്കളായ മനീഷ കൊയ്‌രാള, സൊനാക്ഷി സിന്‍ഹ, റിച്ച ഛദ്ദ, ഷര്‍മിന്‍ സേഗാള്‍, സഞ്ജീദ ഷെയ്ക്ക് എന്നിവര്‍ ചടങ്ങില്‍ എത്തിയിരുന്നു.
എന്നാല്‍ അദിതിയുടെ അഭാവം ശ്രദ്ധിക്കപ്പെട്ടതോടെ പരിപാടിയുടെ ഹോസ്റ്റ് ആയ സച്ചിന്‍ വി കുമ്പാര്‍ അതിനെ കുറിച്ച് വിശദീകരിച്ചു. ”അദിതി ഇവിടെ ഇല്ലാത്തത് എന്തുകൊണ്ടാണെന്ന് ഞങ്ങള്‍ക്ക് അറിയാം. അവള്‍ ഇന്ന് വിവാഹിതയാവുകയാണ്. അതുകൊണ്ട് അവള്‍ക്ക് ആശംസകള്‍ നേരാം” എന്നാണ് ഹോസ്റ്റ പറഞ്ഞത്.
ഇതോടെ അദിതിയും സിദ്ധാര്‍ഥും വിവാഹിതരായി എന്നത് വെറും അഭ്യൂഹമല്ല എന്നത് വ്യക്തമായിരിക്കുകയാണ്. അതേസമയം, 2021ല്‍ ‘മഹാസമുദ്രം’ എന്ന സിനിമയില്‍ ഒരുമിച്ച് അഭിനയിക്കുമ്പോഴാണ് ഇരുവരും പ്രണയത്തിലാകുന്നത്. സിദ്ധാര്‍ഥിന്റെയും അദിതിയുടെയും രണ്ടാം വിവാഹമാണിത്.
2003ല്‍ തന്റെ സിനിമാ അരങ്ങേറ്റത്തിന് പിന്നാലെയാണ് സിദ്ധാര്‍ഥ് വിവാഹിതനാകുന്നത്. എന്നാല്‍ 2007ല്‍ വിവാഹമോചനം നേടി. ബോളിവുഡ് നടന്‍ സത്യദീപ് മിശ്രയാണ് അദിതിയുടെ ആദ്യ ഭര്‍ത്താവ്. 2009ല്‍ വിവാഹിതരായ ഇവര്‍ 2013ല്‍ വേര്‍പിരിഞ്ഞു.
