ബോളിവുഡിലെ മുൻനിരനായികമാരുടെ നിരിൽ നിൽക്കുമ്പോഴും അഭിപ്രായപ്രകടനങ്ങളുടെ പേരിൽ എന്നും വിവാദങ്ങളിൽ നിറഞ്ഞു നിൽക്കുന്ന താരമാണ് കങ്കണ റണൗട്ട്. സാധാരണഗതിയിൽ ബോളിവുഡിലെ പ്രമുഖ താരങ്ങളോട് മുഖം തിരിക്കുന്ന നടി ഇപ്പോൾ പറ‍ഞ്ഞിരിക്കുന്ന അഭിപ്രായമാണ് ബി ടൗണിൽ ചർച്ചയാകുന്നത്. നടൻ ഷാരൂഖ് ഖാൻ ഇന്ത്യൻ സിനിമയുടെ ദൈവമാണ് എന്നായിരുന്നു കങ്കണയുടെ പ്രസ്താവന.
തമിഴകത്തെ ഹിറ്റ്മേക്കർ ആറ്റ്ലിയുടെ സംവിധാനത്തിൽ ഷാരൂഖ് ഖാൻ നായകനായെത്തിയ ജവാൻ തീയേറ്ററുകളിൽ മികച്ച കളക്ഷൻ നേടി പ്രദർശനം തുടരുന്ന സാഹചര്യത്തിലാണ് കങ്കണയുടെ വാക്കുകൾ ചർച്ചയാകുന്നത്.ഷാരൂഖ് ഖാന്റെ ജീവിതം രാജ്യത്തെ സിനിമ പ്രവര്‍ത്തകര്‍ക്ക് പാഠമാണെന്നും കങ്കണ റണൗട്ട് അഭിപ്രായപ്പെടുന്നു. യഥാര്‍ഥ ജീവിതത്തിലും ഷാരൂഖ് ഹീറോയാണെന്ന് താരം അഭിപ്രായപ്പെട്ടു.
തൊണ്ണൂറുകളിലെ പ്രണയ നായകനെന്ന നിലയില്‍ സിനിമയില്‍ ശ്രദ്ധയാകര്‍ഷിച്ച അദ്ദേഹം ഒരു ദശാബ്‍ദത്തോളം നീണ്ട പരിശ്രമത്തില്‍ തന്റെ നാല്‍പതുകളുടെ അവസാനത്തിലും അമ്പതുകളുടെ മധ്യത്തിലും പ്രേക്ഷകരുടെ പ്രിയങ്കരനായി. അറുപതാം വയസില്‍ അദ്ദേഹം ഇന്ത്യൻ സിനിമയിലെ മാസ് ഹീറോയായി മാറി. ഒരിക്കലും അത് ചെറിയ കാര്യമല്ല. കങ്കണ പറഞ്ഞു.
യഥാര്‍ഥ ജീവിതത്തിലും അദ്ദേഹം സൂപ്പര്‍ഹീറോയാണ്. ഒരുകാലത്ത് ആളുകള്‍ അദ്ദേഹത്തെ എഴുതിത്തള്ളുകയും പരിഹസിക്കുകയും ചെയ്‍തത് ഞാൻ ഓര്‍ക്കുന്നു. എന്നാല്‍ അദ്ദേഹത്തിന്റെ പോരാട്ടം ഇന്ത്യൻ സിനിമാ പ്രവര്‍ത്തകര്‍ക്ക് ഒരു പാഠമാണ്. സിനിമാ ദൈവമാണ് ഷാരൂഖ് ഖാനെന്നും താരം അഭിപ്രായപ്പെട്ടു.
Read more
ഷാരൂഖ് ഖാൻ നിറഞ്ഞുനില്‍ക്കുന്ന ഒരു ചിത്രമാണ് ജവാൻ എന്നാണ് പ്രേക്ഷക പ്രതികരണം. നയൻതാരയാണ് ചിത്രത്തിൽ നായികയായെത്തുന്നത്. ദീപിക പദുകോൺ. വിജയ് സേതുപതി, പ്രിയ മണി, തുടങ്ങി പ്രമുഖ താരങ്ങൾ ചിത്രത്തിൽ പ്രധാന വേഷങ്ങളിലെത്തിയിരിക്കുന്നു.അനിരുദ്ധ് രവിചന്ദറിന്റെ സംഗീത സംവിധാനത്തിലുള്ള ഗാനങ്ങളും ചിത്രത്തെ വ്യത്യസ്തമാക്കുന്നു. ഷാരൂഖ് ഖാന്റെ ജവാൻ ഏതൊക്കെ കളക്ഷൻ റിക്കോര്‍ഡുകള്‍ തിരുത്തും എന്നാണ് സിനിമാലോകം ഉറ്റുനോക്കുന്നത്.
