ആരോഗ്യമന്ത്രി കെ.കെ ശൈലജ കോവിഡ് വാക്സിൻ സ്വീകരിക്കുന്ന ചിത്രത്തെ പരിഹസിച്ച് ശ്രീജിത്ത് പണിക്കർ. വസ്ത്രത്തിനു പുറത്തു കൂടി ഇൻജക്ഷൻ എടുക്കുന്ന പോസ് ആണ് സംഗതി മൊത്തത്തിൽ അപഹാസ്യമാക്കിയത് എന്ന് ശ്രീജിത്ത് പണിക്കർ പറഞ്ഞു. വാക്സിൻ സ്വീകരിക്കാൻ മന്ത്രി കസേരയിൽ ഇരിക്കുകയും ആരോഗ്യപ്രവർത്തകർ സമീപം നിൽക്കുകയും ചെയ്യുന്ന പോസ് ആയിരുന്നു അഭികാമ്യം. കുത്തിവെച്ചു തന്നെ കാണിക്കണം എന്നില്ലല്ലോ എന്നും ശ്രീജിത്ത് പണിക്കർ തന്റെ ഫെയ്സ്ബുക്ക് പോസ്റ്റിൽ അഭിപ്രായപ്പെട്ടു.
മന്ത്രിമാരായ കെ.കെ ശൈലജ, ഇ ചന്ദ്രശേഖരൻ, കടന്നപ്പള്ളി രാമചന്ദ്രൻ എന്നിവർ ഇന്ന് വാക്സിൻ സ്വീകരിച്ചിരുന്നു. വാക്‌സിന്റെ ആദ്യ ഡോസ് എടുത്ത് കഴിഞ്ഞാൽ പ്രതിരോധമായെന്ന് കരുതരുത്. 28 ദിവസം കഴിഞ്ഞ് രണ്ടാമത്തെ ഡോസ് എടുക്കണമെന്നും ആരോഗ്യമന്ത്രി ഇന്ന് പറഞ്ഞിരുന്നു.
ശ്രീജിത്ത് പണിക്കരുടെ ഫെയ്സ്ബുക്ക് പോസ്റ്റ്:
സ്ത്രീയാണ്, ഫോട്ടോയ്ക്ക് പോസ് ചെയ്തതാണ് എന്നതൊക്കെ മനസ്സിലാക്കാവുന്നതേ ഉള്ളൂ. വാക്സിൻ സ്വീകരിക്കാൻ മന്ത്രി കസേരയിൽ ഇരിക്കുകയും ആരോഗ്യപ്രവർത്തകർ സമീപം നിൽക്കുകയും ചെയ്യുന്ന പോസ് ആയിരുന്നു അഭികാമ്യം. കുത്തിവെച്ചു തന്നെ കാണിക്കണം എന്നില്ലല്ലോ. വസ്ത്രത്തിനു പുറത്തു കൂടി ഇൻജക്ഷൻ എടുക്കുന്ന പോസ് ആണ് സംഗതി മൊത്തത്തിൽ അപഹാസ്യമാക്കിയത്.
സമാനമായി, കോവിഡ് കാലത്ത് പൾസ് പോളിയോ സ്വീകരിക്കുന്ന ഒരു കുട്ടിയുടെ ചിത്രം ആലോചിച്ചു നോക്കൂ. അമ്മയുടെ മടിയിൽ കിടക്കുന്ന കുട്ടിയുടെ വായിലേക്ക് ആരോഗ്യപ്രവർത്തക മരുന്ന് നൽകുന്നു. ആ കുട്ടി മാസ്ക് ധരിച്ചിട്ടുണ്ടെങ്കിലോ?
അതുപോലെ തന്നെയായി. ഫോട്ടോഗ്രഫി ദുരന്തം. എന്നത്തേതും പോലെ പിആർ പാളി.
