മരണപ്പാച്ചിൽ വേണ്ട ! ബസ് സര്വീസുകള്ക്കിടയില് ഇനി നിര്ബന്ധിത ഇടവേള; നഗരപ്രദേശങ്ങളില് 5 മിനിറ്റും ഗ്രാമീണ പാതകളില് 10 മിനിറ്റും
റോഡുകളിലെ മത്സരയോട്ടവും അശ്രദ്ധമായ ഡ്രൈവിങ്ങും അവസാനിപ്പിക്കുന്നതിന്റെ ഭാഗമായി ബസ് സര്വീസുകള്ക്കിടയില് ജിപിഎസ് മുഖേന നിരീക്ഷിക്കപ്പെടുന്ന നിര്ബന്ധിത സമയ ഇടവേളകള് നടപ്പാക്കാന് സ്റ്റേറ്റ് ട്രാന്സ്പോര്ട്ട് അതോറിറ്റി തീരുമാനിച്ചു. നവംബര് 1 മുതല് പുതിയ സംവിധാനം നിലവില് വരും.
പുതിയ സംവിധാനമനുസരിച്ച് നഗരപ്രദേശങ്ങളില് 5 മിനിറ്റും ഗ്രാമീണ പാതകളില് 10 മിനിറ്റും ആയിരിക്കും ചുരുങ്ങിയ ഇടവേള. ജിപിഎസ് സാങ്കേതികവിദ്യയുടെ സഹായത്തോടെ ആപ്പുകള് വഴിയും മറ്റ് ഡിജിറ്റല് പ്ലാറ്റ്ഫോമുകള് വഴിയുമാണ് തത്സമയ ലൊക്കേഷനുകളും സമയക്രമവും നിരീക്ഷിക്കുന്നത്.
കേന്ദ്രീകൃത ഡിജിറ്റല് പ്ലാറ്റ്ഫോമിലേക്ക് ഉള്പ്പെടുത്തുന്നതിനായി സ്വകാര്യ ബസ് ഉടമകളില് നിന്നും കെഎസ്ആര്ടിസിയില് നിന്നും ട്രിപ്പ് ഷെഡ്യൂളുകള് ശേഖരിക്കുന്ന പ്രവൃത്തികള് റീജിയണല് ട്രാന്സ്പോര്ട്ട് അതോറിറ്റികള് ഇതിനകം ആരംഭിച്ചു. നവംബര് 1ന് പുതിയ സംവിധാനം ഉദ്ഘാടനം ചെയ്യുന്നതിന് മുന്നോടിയായി റൂട്ടുകളിലെ കൃത്യവും സുരക്ഷിതവുമായ സമയക്രമം തയ്യാറാക്കാന് ഈ വിവരങ്ങള് സോഫ്റ്റ്വെയറിലേക്ക് നല്കും.
കേരള ബസ്സ്, ബസ് ടൈം പോലുള്ള ഡിജിറ്റല് പ്ലാറ്റ്ഫോമുകള് യാത്രക്കാര്ക്ക് തത്സമയ വിവരങ്ങള് നല്കും. സര്വീസുകള്ക്കിടയില് കൃത്യമായ ഇടവേളകളും അനുയോജ്യമായ സമയക്രമവും ഉണ്ടായാല് ബസുകള്ക്ക് സുഗമമായി സര്വീസ് നടത്താന് കഴിയുമെന്ന് കേരള സ്റ്റേറ്റ് ബസ് ഓപ്പറേറ്റേഴ്സ് ഫെഡറേഷന് ജനറല് സെക്രട്ടറി ഹംസ എരിക്കുന്നന് വ്യക്തമാക്കി. നിലവില് സംസ്ഥാനത്ത് ഏകദേശം 7,000 സ്വകാര്യ ബസുകളും 4,468 കെഎസ്ആര്ടിസി ബസുകളുമാണ് സര്വീസ് നടത്തുന്നത്.
ആസൂത്രണ ബോർഡ് പരീക്ഷാ ക്രമക്കേട്; ചോദ്യം ചെയ്യലിന് കൂടുതൽ പി.എസ്.സി അംഗങ്ങളെ വിളിച്ചുവരുത്താൻ ക്രൈംബ്രാഞ്ച്
കോന്നിയിൽ എക്സ്-റേയും മരുന്നും മാറിനൽകിയ സംഭവം; വീഴ്ച വരുത്തിയവർക്കെതിരെ നടപടിയെടുക്കാൻ നിർദേശം നൽകി ആരോഗ്യമന്ത്രി
