മലയാള സിനിമയ്ക്ക് അഭിമാനമായി സനല് കുമാര് ശശിധരന് സംവിധാനം ചെയ്ത “ചോല” വെനീസ് അന്താരാഷ്ട്ര ചലചിത്രോത്സവത്തില് റെഡ് കാര്പ്പറ്റ് വേള്ഡ് പ്രീമിയറില് പ്രദര്ശിപ്പിച്ചിരുന്നു. സനല് കുമാര് ശശിധരന്, ജോജു ജോര്ജ്ജ്, നിമിഷ സജയന്, സിജോ വടക്കന് ,ഷാജി മാത്യു എന്നിവര് ചിത്രത്തിന്റെ പ്രദര്ശനം കാണാന് റെഡ് കാര്പ്പറ്റ് വേള്ഡ് പ്രീമിയറില് സന്നിഹിതരായിരുന്നു. മുണ്ടുടുത്ത് നാടന് ലുക്കിലായിരുന്നു ജോജു. നിറഞ്ഞ കൈയടികളോടെയാണ് സദസ്സ് ഇവരെ വരവേറ്റത്.
ജോജുവിനൊപ്പം കറുത്ത മുണ്ടുടുത്ത് നിന്ന പയ്യനെയും എല്ലാവരും ശ്രദ്ധിച്ചു. അഖില് വിശ്വനാഥ് എന്ന ആ ചെറുപ്പക്കാരനായിരുന്നു അത്. അഖില് ഫെയ്സ്ബുക്കില് പങ്കുവെച്ച കുറിപ്പും ശ്രദ്ധ പിടിച്ചു പറ്റുന്നതാണ്. “മുണ്ടുടുത്തു ചെന്നതിനു എന്നെ ക്ലാസ്സില് നിന്നും പുറത്താക്കിയിട്ടുണ്ട്.. ആ ഞാന് ഇന്ന് നമ്മള് കേരളീയരുടെ മുണ്ടുടുത്തു വെനീസ് ഇന്റര്നാഷനല് ഫിലിം ഫെസ്റ്റിവല് വരെ എത്തി. അതും ലജന്സിന്റെ കൂടെ. അഭിമാന നിമിഷം.” എന്നാണ് അഖില് ഫെയ്സ്ബുക്കില് കുറിച്ചത്.
Read more
ചോലയില് ഒരു സുപ്രധാന വേഷത്തില് അഖില് അഭിനയിക്കുന്നുണ്ട്. വര്ഷങ്ങളുടെ ഇടവേളകള്ക്കു ശേഷം വെനീസ് മേളയിലേക്ക് തിരഞ്ഞെടുത്ത മലയാള സിനിമയാണ് ചോല. അടൂര് ഗോപാലകൃഷ്ണന്റെ മതിലുകള്, നിഴല്കൂത്ത് എന്നിവയാണ് ഇതിനു മുമ്പ് വെനീസ് ചലച്ചിത്രമേളയിലേക്ക് മലയാളത്തില് നിന്ന് പ്രദര്ശിപ്പിക്കപ്പെട്ട ചലച്ചിത്രങ്ങള്. ലോകസിനിമയിലെ പുതിയ ട്രെന്ഡുകളെ പരിചയപ്പെടുത്തുന്ന ഒറിസോണ്ടി മത്സര വിഭാഗത്തിലാണ് ചോല തിരഞ്ഞെടുക്കപ്പെട്ടിരുന്നത്.