കേരള ബ്ലാസ്റ്റേഴ്സ് സൂപ്പര്‍ താരം വെസ് ബ്രൗണ്‍ കേരളത്തിലെത്താനുള്ള കാരണം ഒടുവില്‍ വ്യക്തമാക്കി. ഐഎസ്എല്ലിലേക്കെന്ന വാര്‍ത്തകളുടെ തുടക്കം മുതല്‍ അത്ലറ്റിക്കോ കൊല്‍ക്കത്തയടക്കമുള്ള ക്ലബ്ബുകള്‍ താരത്തിനായി രംഗത്തെത്തിയിരുന്ന വാര്‍ത്തകള്‍ സ്ഥിരീകരിച്ചാണ് കേരള ബ്ലാസ്‌റ്റേഴ്‌സിലെത്താനുള്ള തീരുമാനത്തിനു പിന്നിലുള്ള കാരണം ബ്രൗണ്‍ വ്യക്തമാക്കിയത്.
മാഞ്ചസ്റ്റര്‍ യുണൈറ്റഡിന്റെ പ്രതിരോധ ഭടനായിരുന്ന ബ്രൗണ്‍ യുണൈറ്റഡില്‍ തനിക്കൊപ്പമുണ്ടായിരുന്ന താരങ്ങള്‍ക്കൊപ്പം കളിക്കാന്‍ താല്‍പ്പര്യപ്പെട്ടതാണ് ബ്ലാസ്റ്റേഴ്‌സിലെത്താന്‍ കാരണമെന്ന് ഇഎസ്പിഎന്നിന് നല്‍കിയ അഭിമുഖത്തില്‍ താരം പറഞ്ഞു. ബ്ലാസ്റ്റേഴ്‌സിന്റെ സൂപ്പര്‍ സൈനിങ്ങായ ബെര്‍ബയും (ബെര്‍ബറ്റോവ്) ഗോള്‍ കീപ്പര്‍ പോള്‍ റഹുബ്കയും യുണൈറ്റഡില്‍ ബ്രൗണിന് ഒപ്പമുണ്ടായിരുന്നവരാണ്. ഇവരോടുള്ള അടുപ്പമാണ് താരത്തെ മഞ്ഞപ്പടയിലെത്തിച്ചതെന്നാണ് അഭിമുഖത്തില്‍ ബ്രൗണ്‍ വ്യക്തമാക്കിയത്. ബ്ലാസ്റ്റേഴ്‌സിന്റെ പരിശീലകനായ റെനെ മ്യൂലന്‍സ്റ്റീനും യുണൈറ്റഡില്‍ ബ്രൗണിന്റെ കരിയറില്‍ വളരെയധികം സ്വാധീനിച്ച വ്യക്തിയാണ്. അതിനാല്‍ തന്നെ ഇവരുടെ സാന്നിധ്യം ബ്ലാസ്റ്റേഴ്സിനെ തിരഞ്ഞെടുക്കുന്നതില്‍ താരത്തിന് നിര്‍ണായകമായി.
Read more
അത്ലറ്റിക്കോ കൊല്‍ക്കത്തയുടെ വമ്പന്‍ പ്രലോഭനങ്ങള്‍ മറികടന്നാണെന്ന് താരം കൊച്ചിയുമായി കരാറിലെത്തിയതെന്നും ബ്രൗണ്‍ വെളിപ്പെടുത്തി. എടികെ കോച്ച് ടെഡി ഷെറിങ്ഹാം നേരിട്ട് വിളിച്ചു ടീമില്‍ ചേരാന്‍ ആവശ്യപ്പെട്ടിരുന്നു. ബ്രൗണ്‍ വ്യക്തമാക്കി. ബ്ലാസ്റ്റേഴ്സ് നിരയില്‍ പരിക്കുമൂലം ആദ്യ മത്സരങ്ങള്‍ക്ക് ഇറങ്ങാന്‍ സാധിക്കാതിരുന്ന ബ്രൗണിനെ പിന്നീടുള്ള മത്സരങ്ങളില്‍ ഡിഫന്‍സീവ് മിഡ്ഫീള്‍ഡറാക്കി മ്യൂലന്‍സ്റ്റീന്‍ പരീക്ഷിച്ചിരുന്നു.
