കേരള ബ്ലാസ്‌റ്റേഴ്‌സിന്റ പ്രകടനത്തില്‍ അസംതൃപ്തി പരസ്യമാക്കി കോച്ച് റെനെ മ്യൂലന്‍സ്റ്റീന്‍. ജംഷഡ്പൂര്‍ എഫ്‌സിക്കെതിരെയുളള മത്സര ശേഷം മാധ്യമ പ്രവര്‍ത്തകരോടാണ് റെനെ തന്റെ നിരാശ പങ്കുവെച്ചത്.
ബ്ലാസ്റ്റേഴ്സ് ആരാധകര്‍ ഇതിനേക്കാളും മികച്ച ഫുട്‌ബോള്‍ അര്‍ഹിക്കുന്നുണ്ട് എന്ന് പറഞ്ഞ റെനെ അവസരങ്ങളൊന്നും ഗോളാക്കി മാറ്റാന്‍ തങ്ങള്‍ക്ക് കഴിഞ്ഞില്ലെന്ന് കുറ്റസമ്മതം നടത്തുന്നു. ബ്ലാസ്റ്റേഴ്സ് ഒരു ഗോള്‍ കൂടി നേടുന്നതോടെ കാര്യങ്ങള്‍ മാറിമറിയുമെന്നും ഇത് കളിക്കാരുടെ ആത്മ വിശ്വാസം ഉയര്‍ത്തുമെന്നും ബ്ലാസ്റ്റേഴ്സ് കോച്ച് പറയുന്നു.
ജംഷഡ്പൂറിനെതിരായ മത്സരത്തില്‍ ഒരേയൊരു മെച്ചം ക്ലീഷ് ഷീറ്റ് മാത്രമാണെന്ന് പറയുന്ന റെനെ ഓരോ കളി കഴിയുന്തോറും ടീം മെച്ചപ്പെട്ട് വരുമെന്ന്് ആത്മവിശ്വാസ പ്രകടിച്ചു.
ഐഎസ്എല്ലില്‍ രണ്ട് ഹോം മത്സരങ്ങള്‍ കഴിയുമ്പോള്‍ ഒരു ഗോള്‍ പോലും നേടാന്‍ കേരള ബ്ലാസ്‌റ്റേഴ്‌സിന് ആയിട്ടില്ല. ആദ്യ മത്സത്തില്‍ എടികെയോടും കഴിഞ്ഞ മത്സത്തില്‍ ജംഷ്ഡ്പൂര്‍ എഫ്‌സിയോടും ഗോള്‍ രഹിത സമനില വഴങ്ങുകയായിരുന്നു കേരള ടീം.
പ്രതിരോധ നിരയുടെ തകര്‍പ്പന്‍ പ്രകടനവും ഗോളിയുടെ അവസരോചിതമായ ഇടപെടലുകളുമാണ് രണ്ട് മത്സരത്തിലും ബ്ലാസ്റ്റേഴ്സ് തോല്‍ക്കാതിരിക്കാന്‍ കാരണം. മുംബൈ സിറ്റിയ്‌ക്കെതിരെയാണ് ബ്ലാസ്‌റ്റേഴ്‌സിന്റെ അടുത്ത മത്സരം.