ഐ.സി.സി ലോക ടെസ്റ്റ് ചാമ്പ്യന്‍ഷിപ്പ് കിരീടം നേടിയാല്‍ അമിത ആഹ്ളാദം വേണ്ടെന്ന് താന്‍ താരങ്ങളോട് പറഞ്ഞിരുന്നെന്ന് വെളിപ്പെടുത്തി ന്യൂസിലന്‍ഡ് നായകന്‍ കെയ്ന്‍ വില്യംസണ്‍. എന്നാലത് അവര്‍ കേട്ടില്ലെന്നും അവര്‍ കിരീടനേട്ടം നന്നായി ആഘോഷിച്ചെന്നും വില്യംസണ്‍ പറഞ്ഞു.
“കിരീടം നേടിയ ശേഷം അമിത ആഹ്ളാദം വേണ്ടെന്ന് ഞാന്‍ താരങ്ങളോട് പറഞ്ഞിരുന്നു. എന്നാല്‍ അവരത് ഉള്‍ക്കൊണ്ടില്ല. കാരണം ഇതിന് മുമ്പ് കൈയകലത്ത് നഷ്ടപ്പെട്ട പല കിരീടങ്ങളുടെയും ഭാഗമായവര്‍ ഇക്കൂടെ ഉണ്ടായിരുന്നു. അതിനാല്‍ തന്നെ നന്നായി അവര്‍ കിരീടനേട്ടം ആഘോഷിച്ചു” വില്യംസണ്‍ പറഞ്ഞു.
ഇന്ത്യന്‍ നായകന്‍ വിരാട് കോഹ്ലിയുമായുള്ള സൗഹൃദത്തെ കുറിച്ചും വില്യംസണ്‍ വാചാലനായി. “വിരാടും ഞാനും തമ്മില്‍ ഏറെ നാളുകളായി അറിയാവുന്നവരാണ്. ഞങ്ങള്‍ നല്ല സുഹൃത്തുക്കളാണ്. വര്‍ഷങ്ങളായി നിരവധി ആളുകളെ ഞങ്ങള്‍ കണ്ടുകൊണ്ടിരിക്കുകയാണ്. പരസ്പരം താത്പര്യമുള്ള കാര്യങ്ങളെ കുറിച്ചുള്ള കാര്യങ്ങള്‍ പങ്കുവെയ്ക്കുന്നത് വളരെ സവിശേഷമായ കാര്യമാണ്. ഞങ്ങളത് ചെയ്യാറുണ്ട്” വില്യംസണ്‍ പറഞ്ഞു.
Read more
ഫൈനലില്‍ ഇന്ത്യ എല്ലാ മേഖലയിലും പരാജയപ്പെട്ട മത്സരത്തില്‍ ന്യൂസിലന്‍ഡ് എട്ട് വിക്കറ്റിനാണ് ജയിച്ചു കയറിയത്. രണ്ട് ദിവസം പൂര്‍ണമായും മഴയെടുത്ത മത്സരത്തിന്‍റെ റിസര്‍വ് ദിനത്തിലാണ് ന്യൂസിലന്‍ഡ് ജയം പിടിച്ചു വാങ്ങിയത്.
