ചില മനുഷ്യര്‍ക്ക് പ്രായം കൂടില്ല എന്ന് തോന്നും. ദിനേഷ് കാര്‍ത്തിക് അത്തരത്തിലൊരാളാണ്. ധോണിയ്ക്കുമുമ്പേ അരങ്ങേറ്റം കുറിച്ച താരമാണ് കാര്‍ത്തിക്. ധോണി അന്താരാഷ്ട്ര ക്രിക്കറ്റ് മതിയാക്കി. കാര്‍ത്തിക് ഇപ്പോഴും ഇന്ത്യന്‍ ടീമില്‍നിന്ന് വിരമിച്ചിട്ടില്ല. ഐ.പി.എല്ലിലെ മിന്നല്‍ പ്രകടനങ്ങളിലൂടെ ഇന്ത്യന്‍ സെലക്ടര്‍മാരെ പ്രലോഭിപ്പിക്കുകയും ചെയ്യുന്നു!
രാജസ്ഥാന്‍ ഏകപക്ഷീയമായി ജയിക്കും എന്ന് കരുതിയ കളിയാണ് അഞ്ച് പന്തുകള്‍ ബാക്കിനില്‍ക്കെ ആര്‍.സി.ബി ഫിനിഷ് ചെയ്തത്. ഒറ്റ ഓവര്‍ കൊണ്ടാണ് കാര്‍ത്തിക് കളിയുടെ ഗതി തിരിച്ചുവിട്ടത്. അതും ആധുനിക ക്രിക്കറ്റിലെ ഏറ്റവും നല്ല ബോളര്‍മാരിലൊരാളായ അശ്വിനെ തലങ്ങും വിലങ്ങും തല്ലിച്ചതച്ചുകൊണ്ട്!
ഐ.പി.എല്‍ തുടങ്ങിയതിനുശേഷം ഒരേയൊരു മാച്ച് മാത്രമാണ് കാര്‍ത്തിക് മിസ് ചെയ്തിട്ടുള്ളത് എന്ന് ഹര്‍ഷ ഭോഗ്ലെ പറയുന്നുണ്ടായിരുന്നു. കാര്‍ത്തിക്കിനെ ഒരുതവണ പുറത്തിരുത്തിയ ഡെല്‍ഹി ഡെയര്‍ഡെവിള്‍സ് ടീമിന്റെ പേര് വരെ മാറി! കാര്‍ത്തിക് ഇപ്പോഴും കത്തിജ്ജ്വലിച്ചുകൊണ്ടിരിക്കുന്നു!
ഇയാള്‍ ഇത് ഇന്നും ഇന്നലെയും തുടങ്ങിയതല്ല. എന്നെങ്കിലും ഇത് അവസാനിക്കുമെന്ന തോന്നലും ഉണ്ടാവുന്നില്ല. കാര്‍ത്തിക്ക് ഉള്ളിടത്തോളം കാലം നമുക്കും പ്രായമാവുകയില്ല.
ഞങ്ങള്‍ക്ക് നിത്യയൗവ്വനം സമ്മാനിക്കുന്ന പ്രിയപ്പെട്ടവനേ, ഒരായിരം നന്ദി…!
Read more
കടപ്പാട്: മലയാളി ക്രിക്കറ്റ് സോണ്‍
