വിരാട് കോഹ്‌ലിയുടെ അഭാവത്തില്‍ പല പ്രതിസന്ധികളും തരണം ചെയ്ത് ഓസ്ട്രേലിയക്കെതിരായ ബോര്‍ഡര്‍ ഗവാസ്‌കര്‍ ട്രോഫി നിലനിര്‍ത്താനായതിന്റെ നിര്‍വൃതിയിലാണ് അജിങ്ക്യ രഹാനെ. എന്നാലും രഹാനെ ഇത് തന്റെ നായകമികവിന്റെ നേട്ടമായി കണക്കാക്കുന്നില്ല. തന്റെ നേട്ടമല്ല, ഇത് ടീമിന്റെ മുഴുവന്‍ നേട്ടമാണെന്നാണ് രഹാനെ പറയുന്നത്.
“രാജ്യത്തെ നയിക്കാന്‍ കഴിയുകയെന്നത് വലിയ അംഗീകാരമാണ്. എന്റെ നേട്ടമല്ലിത്, ടീമിന്റെ നേട്ടമാണ്. എല്ലാവരുടെയും വലിയ സംഭാവനകള്‍ ഉണ്ടായിരുന്നതിനാലാണ് എന്റെ ക്യാപ്റ്റന്‍സി മികച്ചതായി തോന്നിയത്. കളത്തിലെ മനോഭാവവും സ്വഭാവവുമെല്ലാം ഞങ്ങള്‍ക്ക് പ്രധാനപ്പെട്ടതായിരുന്നു.”
“അഡ് ലെയ്ഡ് ടെസ്റ്റിന് ശേഷമുള്ള കാര്യങ്ങള്‍ വളരെ പ്രയാസമുള്ളതായിരുന്നു. എന്നാല്‍ ഇന്ത്യയുടെ പോരാട്ടവീര്യം കൊണ്ട് അതിനെ അതിജീവിക്കാനായി. ഫലത്തെക്കുറിച്ച് അധികമായി ഞങ്ങള്‍ ചിന്തിച്ചില്ല. മനോഹരമായ ക്രിക്കറ്റ് കളിക്കാനാണ് ശ്രമിച്ചത്. സപ്പോര്‍ട്ടിംഗ് സ്റ്റാഫ് ഉള്‍പ്പെടെ ടീമിന്റെ ഭാഗമായ എല്ലാവരുമാണ് വിജയത്തിന്റെ അഭിനന്ദനം അര്‍ഹിക്കുന്നത്. ശുബ്മാന്‍ ഗില്ലും വാഷിങ്ടണ്‍ സുന്ദറും ശര്‍ദുല്‍ ഠാക്കൂറും നടത്തിയ പ്രകടനം വിലമതിക്കാനാവാത്തതാണ്.”
Read more
“ഈ ജയം ഞങ്ങളെല്ലാം നന്നായി ആസ്വദിച്ചു. ഞങ്ങള്‍ മാത്രമല്ല എല്ലാ ഇന്ത്യക്കാരും ഈ ജയം ആസ്വദിച്ചുവെന്ന് അറിയാം. ഇപ്പോള്‍ നേടിയ ഈ ചരിത്രനേട്ടത്തിന്റെ ആഹ്ലാദം ഈ രാത്രിയോടെ അവസാനിക്കും. ഞങ്ങള്‍ ഇന്ത്യയിലെത്തിയാല്‍ ഇംഗ്ലണ്ട് പരമ്പരയെക്കുറിച്ച് മാത്രമാവും ചിന്ത” രഹാനെ പറഞ്ഞു. അടുത്ത മാസം 5ന് ഇന്ത്യ-ഇംഗ്ലണ്ട് ടെസ്റ്റ് പരമ്പര ആംരഭിക്കും. ചെന്നൈയാണ് വേദി.
