ഐപിഎൽ 2024 ലേലത്തിന് ശേഷം, ചില ടീമുകൾ അവരുടെ വാങ്ങലുകളിൽ സന്തുഷ്ടരായേക്കാം, മറ്റുള്ളവർ മാർച്ചിൽ വരാനിരിക്കുന്ന ടൂർണമെന്റിനായി തങ്ങൾക്ക് ലഭിച്ച കളിക്കാരിൽ അതൃപ്തരായേക്കാം. എന്നിരുന്നാലും തങ്ങൾ വിളിച്ചെടുത്ത താരങ്ങൾ കിരീടം നേടി തരുമോ എന്നുള്ളതും ടീമിന് ഗുണം ചെയ്യുമോ എന്നുള്ളതും കണ്ടറിയേണ്ട കാഴ്ചയാണ്.
ഐപിഎൽ 2024 ലേലത്തിൽ ഏറ്റവും മികച്ചതോ മോശമായതോ ആയ ഒരു ടീമിനെ തിരിച്ചറിയുക അസാധ്യമാണെങ്കിലും, പ്രകടനമാണ് അന്തിമ വിധികർത്താവ് എന്നതിനാൽ, താരങ്ങളെ എടുത്തതിലൂടെ പറ്റിപോയ വലിയ അബദ്ധങ്ങൾ ഏതൊക്കെയാണെന്ന് നമുക്ക് നോക്കാം ( ഈ അനുമാനങ്ങൾ നാളെ ഒരുപക്ഷെ മാറിയേക്കാം )
ചെന്നൈ സൂപ്പർ കിങ്‌സ്
ചെന്നൈ സൂപ്പർ കിംഗ്‌സിന് മികച്ച ഐപിഎൽ 2024 ലേലം ആയിരുന്നു. അവരുടെ ഏറ്റവും ചെലവേറിയ ലേലം 14 കോടി രൂപയ്ക്ക് മിച്ചലിനെ മേടിച്ചത് ആയിരുന്നു. കൂടാതെ അവർക്ക് രച്ചിൻ രവീന്ദ്രയെ 1.8 കോടി രൂപയ്ക്ക് ലഭിച്ചു. 8.4 കോടി രൂപയ്ക്ക് അവർ അൺക്യാപ്ഡ് സമീർ റിസ്‌വിയെ വാങ്ങി, അടിസ്ഥാന വിലയ്ക്ക് മുസ്തഫിസുർ റഹ്മാനിൽ ഒരു ഡെത്ത് ഓവർ ബൗളറെയും അവർ സ്വന്തമാക്കി.
എന്നിരുന്നാലും, അമ്പാട്ടി റായിഡുവിന് പകരക്കാരനായി വളരെ മികച്ച പരിചയസമ്പന്നനായ ഒരു ഇന്ത്യൻ ബാറ്ററെ സ്വന്തമാക്കാൻ അവർക്ക് അവസരം ഉണ്ടായിരുന്നു. ആ ശൂന്യത നികത്താൻ മനീഷ് പാണ്ഡേയ്‌ക്കോ കരുണ് നായർക്കോ പിന്നാലെ സിഎസ്‌കെ പോകുമെന്ന് പലരും പ്രതീക്ഷിച്ചു. എന്നിരുന്നാലും, പരിചയസമ്പന്നനായ ഒരാളെ തേടി പോകുന്നതിനുപകരം, ഒരു യുവതാരത്തിന് വേണ്ടിയാണ് അവർ ശ്രമിച്ചത്. ഈ നീക്കം കൊണ്ട് ഫലം ഉണ്ടാകുമോ എന്നത് കണ്ടറിയണം.
മുംബൈ ഇന്ത്യൻസ്
അഞ്ച് തവണ ഐപിഎൽ ചാമ്പ്യൻമാരായ മുംബൈ ഇന്ത്യൻസ് ഐപിഎൽ 2024-ൽ ഹാർദിക് പാണ്ഡ്യയുടെ കീഴിലാണ് ഇറങ്ങുന്നത്. ഗുജറാത്ത് ടൈറ്റൻസിൽ നിന്ന് ട്രേഡ് ചെയ്യപ്പെട്ട അദ്ദേഹം രോഹിത് ശർമ്മയ്ക്ക് പകരക്കാരനായാണ് വരും സീസണിൽ ക്യാപ്റ്റനായിരിക്കുന്നത്. 2024 ലെ ഐപിഎൽ ലേലത്തിൽ മുംബൈ ഇന്ത്യൻസ് ജെറാൾഡ് കോട്സിയെയാണ് ആദ്യം വാങ്ങിയത്. 2 കോടി രൂപ അടിസ്ഥാന വിലയുണ്ടായിരുന്ന കോറ്റ്സിയെ ആർസിബി, എൽഎസ്ജി എന്നിവയുമായുള്ള ലേല യുദ്ധത്തിന് ശേഷമാണ് അഞ്ച് കോടിക്ക് മുംബൈ സ്വന്തമാക്കിയത്.
ശ്രീലങ്കയിൽനിന്നുള്ള ഒരു സ്ലിംഗർ പേസ് സെൻസേഷനാ ദിൽഷൻ മധുശങ്കയെ സ്വന്തമാക്കിയ മുംബൈ ലെഗ് സ്പിന്നർ ശ്രേയസ് ഗോപാലിനെയും ചുളുവിലയ്ക്കും സ്വന്തമാക്കി. തങ്ങളുടെ ടീമിനെ ശക്തിപ്പെടുത്താൻ വെറ്ററൻ അഫ്ഗാൻ ഓൾറൗണ്ടർ മുഹമ്മദ് നബിയെയും അവർ സ്വന്തമാക്കി. എന്നിരുന്നാലും, അവർക്ക് നഷ്‌ടമായ ഒരു കാര്യം ഗുണനിലവാരമുള്ള ഒരു ഇന്ത്യൻ അല്ലെങ്കിൽ വിദേശ ഫിംഗർ സ്പിന്നറെ വാങ്ങുക എന്നതാണ്. പിയൂഷ് ചൗളയിലും ശ്രേയസ് ഗോപാലിലും രണ്ട് റിസ്റ്റ് സ്പിൻ ഓപ്ഷനുകളും കുമാർ കാർത്തികേയയിൽ ഒരു മിസ്റ്ററി സ്പിന്നറും അവർക്ക് ഉണ്ട്. എന്നാൽ അവർ ഹൃത്വിക് ഷോക്കീനെ വിട്ടയച്ചിരുന്നു, ലേലത്തിൽ അവനെ തേടി അവർ പോയില്ല. ഇത് തിരിച്ചടിക്കുമോ എന്നുളത് കണ്ടറിയണം.
റോയൽ ചലഞ്ചേഴ്സ് ബാംഗ്ലൂർ
മാന്യമായ പേസർ ആക്രമണം ഇല്ലെന്ന് ആർസിബി എപ്പോഴും വിമർശനം നേരിട്ടിട്ടുണ്ട്. എന്നാൽ ഇത്തവണ ഐപിഎൽ 2024 ലേലത്തിൽ, ഫ്രാഞ്ചൈസി അവരുടെ ടീമിനെ ഗുണനിലവാരമുള്ള പേസ് ഓപ്ഷനുകൾ കൊണ്ട് നിറച്ചു. മുഹമ്മദ് സിറാജ്, റീസ് ടോപ്ലി എന്നിവരെ സഹായിക്കാൻ അൽസാരി ജോസഫ്, യാഷ് ദയാൽ, ലോക്കി ഫെർഗൂസൺ, ടോം കറാൻ എന്നിവരെ അവർ വാങ്ങി. എന്നിരുന്നാലും, വനിന്ദു ഹസരംഗയ്ക്ക് പകരം ഒരു സ്പെഷ്യലിസ്റ്റ് സ്പിന്നറെ തിരഞ്ഞെടുക്കാൻ അവർ തീരുമാനിച്ചില്ല. അവർക്ക് കർൺ ശർമ്മ, മായങ്ക് ദാഗർ, ഹിമാൻഷു ശർമ്മ, സൗരവ് ചൗഹാൻ എന്നിവരിൽ സ്പിൻ ഓപ്ഷനുകളുണ്ട്, എന്നാൽ ഹസരംഗയ്ക്ക് ഉണ്ടായിരുന്ന മാച്ച് വിന്നിംഗ് നിലവാരം ആർക്കും ഇല്ല.
ഗുജറാത്ത് ടൈറ്റൻസ്
യുവ ഓസ്‌ട്രേലിയൻ പേസർ സ്പെൻസർ ജോൺസണായി ഗുജറാത്ത് ടൈറ്റൻസ് 10 കോടി രൂപ ചെലവഴിച്ചു, ഉമേഷ് യാദവിനെയും കാർത്തിക് ത്യാഗിയെയും സ്വന്തമാക്കി അവർ പേസ് ആക്രമണം ശക്തിപ്പെടുത്തി. ഹാർദിക് പാണ്ഡ്യയ്ക്ക് പകരക്കാരനായി അസ്മത്തുള്ള ഒമർസായിയെ അവർക്ക് കുറഞ്ഞ വിലയ്ക്ക് ലഭിച്ചു. ഷാരൂഖ് ഖാനിൽ ഒരു ബിഗ് ഹിറ്ററെ കൂടി അവർ കണ്ടു.
എന്നിരുന്നാലും, വൃദ്ധിമാൻ സാഹ, മാത്യു വെയ്ഡ് എന്നീ രണ്ട് വിക്കറ്റ് കീപ്പർമാർ മാത്രമാണ് ജിടിക്ക് ഉള്ളത്. അവർക്ക് മറ്റൊരു ഇന്ത്യൻ കീപ്പറെ ബാക്കപ്പായി എടുക്കാമായിരുന്നു, അത് കെയ്ൻ വില്യംസണെ പ്ലേയിംഗ് ഇലവനിൽ ഉൾപ്പെടുത്താൻ അവരെ സഹായിക്കും. മിച്ചൽ സ്റ്റാർക്കിനെ സ്വന്തമാക്കാൻ അവർ പരമാവധി ശ്രമിച്ചെങ്കിലും അവസാന നിമിഷം തലകുനിക്കേണ്ടി വന്നു.
ലക്ക്നൗ സൂപ്പർ ജയന്റ്സ്
ഐപിഎൽ 2024 ലേലത്തിന് മുമ്പ് എൽഎസ്ജി അവരുടെ ജോലിയുടെ പകുതിയും ചെയ്തു, അവർ തങ്ങളുടെ ബാറ്റിംഗിനെ ശക്തിപ്പെടുത്തുന്നതിനായി രാജസ്ഥാനിൽ നിന്ന് ദേവദത്ത് പടിക്കലിനെ സ്വന്തമാക്കി. പേസ് യൂണിറ്റിന് കരുത്ത് പകരാൻ ശിവം മാവി, ഡേവിഡ് വില്ലി, അർഷിൻ കുൽക്കർണി എന്നിവരെയും അവർ സ്വന്തമാക്കി. എന്നിരുന്നാലും, അവരുടെ ബൗളിംഗ് മാർക്ക് വുഡിനെയും മൊഹ്‌സിൻ ഖാനെയും വളരെയധികം ആശ്രയിക്കുന്നതിനാൽ പരിചയസമ്പന്നരായ കുറച്ച് ഇന്ത്യൻ പേസർമാർക്ക് പോകാനാവില്ല എന്നതാണ് അവരുടെ ഏറ്റവും വലിയ നഷ്ടം.
പഞ്ചാബ് കിംഗ്‌സ്
പഞ്ചാബ് കിംഗ്‌സ് ഹർഷൽ പട്ടേലിന് വേണ്ടി 11.75 കോടി രൂപ നൽകി. മാന്യമായ തുകയ്‌ക്ക് റിലീ റുസോവിനെയും ക്രിസ് വോക്‌സിനെയും സ്വന്തമാക്കി. എന്നിരുന്നാലും, ഒരു പ്രത്യേക സ്ഥാനത്തിനായി മത്സരിക്കുന്ന ഒന്നിലധികം വിദേശ കളിക്കാർ ഉള്ളതിനാൽ ടീമിനെ തിരഞ്ഞെടുക്കുമ്പോൾ പിബികെഎസിനും ക്യാപ്റ്റൻ ശിഖർ ധവാനും തലവേദനയാകും. ഷാരൂഖ് ഖാനെ റിലീസ് ചെയ്തതിലൂടെ അവർക്ക് ഒരു ഫിനിഷർ സ്ഥാനം അലങ്കരിക്കാൻ പറ്റിയ താരത്തെയും നഷ്ടമായി.
കൊൽക്കത്ത നൈറ്റ് റൈഡേഴ്സ്
24.75 കോടി രൂപയ്ക്ക് മിച്ചൽ സ്റ്റാർക്കിനെ വാങ്ങി ഐപിഎൽ ചരിത്രത്തിലെ ഏറ്റവും ചെലവേറിയ വാങ്ങലായി കെകെആർ ചരിത്രം സൃഷ്ടിച്ചു. എന്നിരുന്നാലും, അവരുടെ ലേലം അവർ വിചാരിച്ചത് പോലെ നടന്നില്ല. അവർക്ക് ഒരു വലിയ പ്രശ്നം അവരുടെ ബാറ്റിംഗാണ്, കാരണം അവർ ടോപ് ഓർഡറിൽ റഹ്മാനുള്ള ഗുർബാസിനെ വളരെയധികം ആശ്രയിക്കുന്നു. കൂടാതെ അവരുടെ ഇന്ത്യൻ പേസർമാർക്ക് കാര്യമായ പരിചയമില്ല.
ആഴമില്ലായ്മയാണ് അവരുടെ ബാറ്റിംഗിലെ മറ്റൊരു പ്രശ്നം. ആ ഫിനിഷറുടെ റോൾ നിറയ്ക്കാൻ അവർ ഷെർഫാൻ റൂഥർഫോർഡിനെയും രമൺദീപ് സിങ്ങിനെയും വാങ്ങിയിട്ടുണ്ടെങ്കിലും, ഇരുവരും അത്ര പരിചയം ഉള്ളവർ അല്ല. ചേതൻ സക്കറിയയ്‌ക്കൊപ്പം വൈഭവ് അറോറ, ഹർഷിത് റാണ തുടങ്ങിയ യുവ പേസർമാരെ സ്റ്റാർക്കിന് നയിക്കേണ്ട ഗതിയാണ്.
സൺറൈസേഴ്‌സ് ഹൈദരാബാദ്
പത്ത് ഫ്രാഞ്ചൈസികളിലും,ഹൈദരാബാദ് ലേലത്തിൽ മികച്ച് നിന്നെന്ന് പറയാം. പാറ്റ് കമ്മിൻസിനെ 20.5 രൂപയ്ക്ക് സ്വന്തമാക്കാൻ സൺറൈസേഴ്‌സ് മറ്റ് നാല് ടീമുകളെ തകർത്തെറിഞ്ഞു. അതേസമയം വനിന്ദു ഹസരംഗ അടിസ്ഥാന വിലയ്ക്ക് അവർക്ക് കിട്ടി. അവർക്ക് 10 കോടി രൂപയിൽ താഴെ വിലയ്ക്ക് ട്രാവിസ് ഹീദിനെയും ലഭിച്ചു, മിക്കവാറും അദ്ദേഹം അവർക്കായി ഇന്നിംഗ്സ് ഓപ്പൺ ചെയ്യും.
പാറ്റ് കമ്മിൻസിനായി ഏകദേശം 21 കോടി രൂപ നൽകുന്നത് വളരെ അധികമാണെന്ന് എല്ലാവരും പറഞ്ഞേക്കാം. എന്നാൽ ഇത് അവരുടെ ക്യാപ്റ്റൻ ആരെന്ന അവരുടെ പ്രശ്നം പരിഹരിച്ചേക്കാം. കഴിഞ്ഞ സീസണിൽ എയ്ഡൻ മാർക്രം ഈ ജോലി ചെയ്തു, എന്നാൽ കമ്മിൻസ് ഓസ്‌ട്രേലിയയെ ലോകകപ്പ് മഹത്വത്തിലേക്ക് നയിച്ചതോടെ, ഐ‌പി‌എല്ലിലും അദ്ദേഹത്തിന് നായകസ്ഥാനം നൽകിയേക്കാം.
രാജസ്ഥാൻ റോയൽസ്
രാജസ്ഥാൻ റോയൽസ് അവരുടെ പണത്തിന്റെ 90 ശതമാനവും റോവ്മാൻ പവലിലും ശുഭം ദുബെയിലും വാങ്ങലുകൾക്കായി ചെലവഴിച്ചു. റിയാൻ പരാഗിനെ കൂടാതെ ശരിയായ ഒരു ഓൾറൗണ്ടറുടെ അഭാവമാണ് അവരുടെ ടീമിലെ ഏറ്റവും ബുദ്ധിമുട്ടുള്ള കാര്യമായി പറയുന്നത്. ആ സ്ഥാനം നല്കാൻ അവർക്ക് മാന്യമായ ഒരു ഓൾറൗണ്ടറോ വിദേശനോ ഇന്ത്യക്കാരനോ ആവശ്യമായിരുന്നു, പക്ഷേ ഫണ്ടിന്റെ അഭാവം കാരണം അവർക്ക് കഴിഞ്ഞില്ല. 22 പേരടങ്ങുന്ന അവരുടെ സ്ക്വാഡ് പത്ത് ടീമുകളിൽ ഏറ്റവും ചെറുതാണ്.
ഡെൽഹി ക്യാപിറ്റൽസ്
ഐപിഎൽ 2024-ൽ തിരിച്ചുവരാൻ ഒരുങ്ങുന്ന ഋഷഭ് പന്തിന്റെ ബാക്കപ്പ് എന്ന നിലയിലായിരിക്കാം ഡെൽഹി ക്യാപിറ്റൽസ് വിക്കറ്റ് കീപ്പർമാരെ വാങ്ങി കൂട്ടിയത്. ബാക്കപ്പ് വിക്കറ്റ് കീപ്പർമാരായി അവർ ഷായ് ഹോപ്പ്, ട്രിസ്റ്റൻ സ്റ്റബ്സ്, റിക്കി ഭുയി, കുമാർ കുശാഗ്ര എന്നിവരെ വാങ്ങി.
Read more
എന്നിരുന്നാലും, മിച്ചൽ മാർഷിനെയും ഡേവിഡ് വാർണറെയും ആശ്രയിക്കുന്ന അവരുടെ ബാറ്റിംഗ് യുണിറ്റ് പ്രശ്നം ഇത് പരിഹരിക്കില്ല. പൃഥ്വി ഷാ ഫിറ്റ്‌നസിനും ഫോമിനും ബുദ്ധിമുട്ടുന്നു. ഷായുടെ പ്രകടനം മോശമായാൽ ബാക്കപ്പ് ഓപ്പണർമാരുടെ കുറവുമുണ്ട് ടീമിന്.
