എല്‍ഡിഎഫ് സര്‍ക്കാരിനെതിരെ രൂക്ഷ വിമര്‍ശനവുമായി മുതിര്‍ന്ന കോണ്‍ഗ്രസ് നേതാവ് രമേശ് ചെന്നിത്തല. എല്‍ഡിഎഫ് സര്‍ക്കാരിന്റെ നാലാം വര്‍ഷികത്തിന്റെ മറവില്‍ നടക്കുന്നത് വന്‍ അഴിമതിയാണെന്നും രമേശ് ചെന്നിത്തല പറഞ്ഞു. ആഘോഷത്തിന്റെ മറവില്‍ 100 കോടിയിലധികം രൂപ സ്വന്തക്കാര്‍ക്കും ഇഷ്ടക്കാര്‍ക്കും പിണറായി വീതിച്ചു നല്‍കുകയാണെന്നും ചെന്നിത്തല ആരോപിച്ചു.
പാവപ്പെട്ട ആശാ വര്‍ക്കര്‍മാര്‍ക്ക് ഒരു രൂപ പോലും വര്‍ദ്ധിപ്പിച്ചു നല്‍കാത്ത സര്‍ക്കാരാണ് വാര്‍ഷികത്തിന്റെ പേരില്‍ ധൂര്‍ത്താഘോഷം നടത്തുന്നത്. വിഴിഞ്ഞത്ത് പ്രതിപക്ഷ നേതാവിനെ വിളിക്കാത്തത് മുഖ്യമന്ത്രിയുടെ അല്‍പ്പത്തരമാണ് വെളിവാക്കുന്നത്. ഉമ്മന്‍ചാണ്ടി സര്‍ക്കാരിന്റെ കുഞ്ഞാണ് വിഴിഞ്ഞം പദ്ധതിയെന്നും ചെന്നിത്തല കൂട്ടിച്ചേര്‍ത്തു.
അന്ന് പദ്ധതിയെ എതിര്‍ത്ത സിപിഎം സംസ്ഥാന സെക്രട്ടറിയാണ് പിണറായി വിജയനെന്ന് മറക്കരുതെന്നും ചെന്നിത്തല അഭിപ്രായപ്പെട്ടു. വനിതാ നേതാവായ പി കെ ശ്രീമതിയെപ്പോലും കമ്മിറ്റിയില്‍ നിന്ന് പുറത്താക്കി പാര്‍ട്ടിയില്‍ ഏകാധിപത്യം നടത്തുന്നത് പോലെ ഭരണരംഗത്തും ഏകാധിപത്യം പുലര്‍ത്താനാണ് മുഖ്യമന്ത്രി ശ്രമിക്കുന്നതെന്നും ചെന്നിത്തല ആരോപിച്ചു.
മുന്‍ പ്രിന്‍സിപ്പല്‍ സെക്രട്ടറി ശിവശങ്കരനെ പോലെ കെഎം എബ്രഹാമും അഴിമതിക്ക് ജയിലഴിയിലാകുന്നതിന്റെ ഉത്തരവാദിത്വത്തില്‍ നിന്ന് മുഖ്യമന്ത്രിക്ക് എങ്ങനെ മാറി നില്‍ക്കാനാവുമെന്നും ചെന്നിത്തല ചോദിച്ചു.
