രാജ്യത്ത് സാംസ്കാരിക അടിയന്തരാവസ്ഥ നിലനിൽക്കുന്നതായി കേരള ചലച്ചിത്ര അക്കാദമി ചെയർമാൻ കമൽ. എസ് ദുർഗയ്ക്കെതിരായ നടപടി ബോധപൂർവമാണെന്നും അദ്ദേഹം വ്യക്തമാക്കി. സനൽകുമാർ ശശിധരൻ സംവിധാനം ചെയ്ത എസ് ദുർഗയുടെ സെൻസർ സർട്ടിഫിക്കറ്റ് റദ്ദാക്കിയതു സംബന്ധിച്ച് ഒരു പത്ര മാധ്യമത്തിന് നൽകിയ അഭിമുഖത്തിൽ പ്രതികരിക്കുകയായിരുന്നു അദ്ദേഹം.
ചിത്രത്തിന്റെ സെൻസർ സർട്ടിഫിക്കറ്റ് പിൻവലിച്ചത് ബാലിശമായ നടപടിയാണ്. കോടതി വിധി സമ്പാദിച്ചെത്തിയ സംവിധായകനോട് ഇപ്രകാരമല്ലായിരുന്നു ഇടപെടേണ്ടിയിരുന്നത്. പേരിൽ പ്രശ്നമുണ്ടെങ്കിൽ അത് മാറ്റണമെന്ന് ആവശ്യപ്പെടാമായിരുന്നു. എന്നാൽ ഇപ്പോൾ ഉണ്ടായിരിക്കുന്നത് ഫാസിസ്റ്റ് നടപടിയാണെന്നും സിനിമ കാണിക്കരുതെന്നു തന്നെയായിരുന്നു അവരുടെ ആഗ്രഹമെന്നും കമൽ പറഞ്ഞു.
Read more
സിനിമയ്ക്ക് സെൻസർ സർട്ടിഫിക്കറ്റ് ലഭിച്ചാൽ തിരുവനന്തപുരം രാജ്യാന്തര ചലച്ചിത്ര മേളയിൽ ചിത്രം പ്രദർശിപ്പിക്കുമെന്നും കമൽ വ്യക്തമാക്കി. സംവിധായകൻ സനൽകുമാർ ശശിധരനുമായി ഇതുമായി ബന്ധപ്പെട്ട് ചർച്ചകൾ നടത്തുകയാണെന്നും അദ്ദേഹം വ്യക്തമാക്കി.