വിവാഹ സല്‍ക്കാരത്തിന് ശേഷമുള്ള ബിരിയാണിക്ക് സാലഡ് കിട്ടാത്തതിനെ തുടര്‍ന്ന് കൂട്ടയടി. നാലു പേരുടെ തലയ്ക്ക് പരിക്ക്. കഴിഞ്ഞ ദിവസം കൊല്ലം തട്ടാമല പിണയ്ക്കല്‍ ഭാഗത്തെ ഓഡിറ്റോറിയത്തിലാണ് സംഭവം. സാലഡ് കിട്ടാത്തതിനെ തുടര്‍ന്ന് കേറ്ററിംഗ് തൊഴിലാളികളാണ് ചേരിതിരിഞ്ഞ് ഏറ്റുമുട്ടിയത്.
വിവാഹത്തില്‍ പങ്കെടുത്തവര്‍ക്കെല്ലാം ബിരിയാണി വിളമ്പിയ ശേഷം കേറ്ററിംഗ് തൊഴിലാളികള്‍ ആഹാരം കഴിക്കാനിരുന്നു. ഇവര്‍ പരസ്പരം ബിരിയാണി വിളമ്പി നല്‍കുകയായിരുന്നു. എന്നാല്‍ ചിലര്‍ക്ക് സാലഡ് കിട്ടാതായതോടെ തമ്മില്‍ തര്‍ക്കമായി.
ആ തര്‍ക്കം പിന്നീട് കൈയാങ്കളിയില്‍ കലാശിക്കുകയായിരുന്നു. ഇരുവിഭാഗങ്ങളായി തിരിഞ്ഞു യുവാക്കള്‍ ഭക്ഷണം വിളമ്പിയ തൊട്ടിയും പാത്രങ്ങളുമായി ചേരിതിഞ്ഞ് ആക്രമിച്ചു. അക്രമത്തില്‍ നാല് പേരുടെ തലയ്ക്കു പരുക്കേല്‍ക്കുകയായിരുന്നു. ഇവരെ കൂട്ടിക്കടയിലെ സ്വകാര്യ ആശുപത്രിയില്‍ പ്രവേശിപ്പിച്ചു. തൊട്ടിവെച്ച് തലക്കടിച്ചാണ് പരിക്കേറ്റത്. പൊലീസ് കേസെടുത്തിട്ടുണ്ട്.
പിന്നീട് രണ്ട് കൂട്ടരും ഇരവിപുരം പോലീസില്‍ പരാതിയുമായി എത്തി. ഇന്ന് രണ്ടു കൂട്ടരെയും പൊലീസ് സ്റ്റേഷനിലേക്കു വിളിപ്പിച്ചിട്ടുണ്ട്. അടിയുണ്ടാക്കിയവര്‍ക്ക് എതിരെ കേസെടുക്കുമെന്ന് പോലീസ് അറിയിച്ചു.
