സ്പൈഡര്മാന് മാര്വല് സിനിമാറ്റിക് വേള്ഡ് വിട്ടേക്കുമെന്ന ആരാധകരുടെ ആശങ്ക അവസാനിക്കുന്നു. സോണി പിക്ചേഴ്സും മാര്വലിന്റെ ഉടമകളായ ഡിസ്നിയും തമ്മിലുള്ള തര്ക്കം ഒത്തു തീര്പ്പായതോടെയാണ് ആശങ്ക അകലുന്നത്. സ്പൈഡര്മാന് ചിത്രങ്ങളില് കൂടുതല് അവകാശം വേണമെന്ന ഡിസ്നിയുടെ ആവശ്യമാണ് നേരത്തെ ആശങ്കകള്ക്ക് വഴി തുറന്നത്.
പുതിയ ധാരണ അനുസരിച്ച് മാര്വലിന്റെ സ്പൈഡര്മാന്: ഹോം കമിങ് പരമ്പരയിലെ മൂന്നാമത്തെ ചിത്രം ഇരുവരും ചേര്ന്നാവും നിര്മിക്കുക. മാര്വല് സ്റ്റുഡിയോസ് പ്രസിഡന്റ് കെവിന് ഫെയ്ജും സോണി പിക്ചേഴ്സ് മേധാവി ആമി പാസ്ക്കലും ചേര്ന്നാവും പുതിയ ചിത്രം നിര്മിക്കുകയെന്ന് ഇരു കമ്പനികളും ചേര്ന്ന് നടത്തിയ വാര്ത്താസമ്മേളനത്തില് പറഞ്ഞു. ഇരുവരും ചേര്ന്നാണ് പരമ്പരയിലെ ഏറ്റവും അവസാന ചിത്രമായ സ്പൈഡര്മാന്: ഫാര് ഫ്രം ഹോം നിര്മിച്ചത്.
Read more
മാര്വല് കോമിക്സിന്റെ ഉടമസ്ഥതയിലുണ്ടായിരുന്ന സ്പൈഡര്മാന്റെ ഉടമസ്ഥാവകാശം 1999-ലാണ് സോണി സ്വന്തമാക്കുന്നത്. അഞ്ച് സ്പൈഡര്മാന് ചിത്രങ്ങളാണ് സോണി സ്വന്തം നിലയില് ഒരുക്കിയത്. ഒരു ഘട്ടത്തില് നഷ്ടത്തിലായിരുന്ന സോണിയുടെ നിര്മ്മാണ കമ്പനിക്ക് മാര്വലിന്റെ പിന്തുണ ഏറെ നിര്ണായകമായിരുന്നു. 2021 ജൂലൈ പതിനാറിന് റിലീസ് ചെയ്യാന് നിശ്ചയിച്ച പുതിയ ചിത്രത്തില് ടോം ഹോളണ്ട് തന്നെയാവും സ്പൈഡര്മാന്റെ വേഷം ചെയ്യുക.